Tags-Nigaah

maiñ hāsil-e-nazar huuñ tamannā-e-dīd meñ
letā huuñ kaam har bun-e-mū se nigāh kā

vasf-e-jamāl-e-zauq hai ahl-e-nigāh kā
hairat kahūñ ki shor kahūñ vaah vaah kā

mirī nigāh meñ āfāq-e-rañg-o-bū lāshe
mirī zamīn vo hai jis kā āsmāñ tum ho

darūñ-nigāh ko tanhā-ravī kā vahm nahīñ
varā-e-parda to sarḳhīl-e-kārvāñ tum ho

jo mujh ko dekhte haiñ tujhe dekhte haiñ vo
shāyad tirī nigāh kā pardā nahīñ huuñ maiñ

dekhtā hai rah rah kar muñh nigāh vāloñ kā
misra-e-ġharīb apnā naqshā-e-be-zabānī hai

mujh par ba-taur-e-ḳhās thī us kī nigāh-e-lutf
kahtā maiñ kis tarah mire dushman meñ kuchh na thā

zulmat kā jab tilism na TuuTā nigāh se
raushan huā ki dīda-e-raushan meñ kuchh na thā

ye to ma.alūm nahīñ un kā irāda kyā hai
haañ nigāh-e-ġhalat-andāz se dekhā hai mujhe

us kī nigāh-e-nāz ne be-ḳhud banā diyā
ḳhud mujh ko apne-āp kī ab hai ḳhabar kahāñ

tirī nigāh se ojhal sahī magar 'mohsin'
ḳhizāñ kā aks bhī ā.īna-e-bahār meñ thā

chehre pe khaal tak bhī na chhoḌeñge bad-nigāh
ai mere ḳhair-ḳhvāh sañvarne na de mujhe

udhar se ek naujavān lady na.e ḳhayāloñ kī aa rahī hai
nigāh-e-raqsāñ shabāb uryāñ jo is ko dekhe vo muskurā.e

Tahalne jaatī haiñ laḌkiyāñ kuchh hasīn phūloñ kī kyāriyoñ meñ
nigāh-jādū shabāb-jādū jo aañkh Daale vo luT hī jaa.e

hai aaj bhī nigāh-e-mohabbat kī aarzū
par aisī ik nigāh kī qīmat kahāñ se laa.eñ

jo haiñ mast-e-alast un ko ḳhumār-o-sukr kā Dar kyā
nigāh-e-tishna-kām-e-ishq hī dast-e-muġhāñ tak hai

nigāh-e-gul se bulbul yuuñ girī hai
gire jis tarah tinkā āshiyāñ se

nigāh-e-mast-e-sāqī meñ hai kyā dārā-e-be-hoshī
ki sāġhar lag rahā hai muñh se aur mai-ḳhvār sote haiñ

ai mausamoñ ke ḳhudā bhed ye khule āḳhir
nigāh-e-shāḳh meñ kaise shajar tamāshā hai

figār ho ke bhī rakkhegā ābrū-e-numū
nigāh-e-zar meñ jo dast-e-hunar tamāshā hai