Tags-Nigaah

haa.e vo jalva-e-aiman vo nigāh-e-sar-e-tūr
fitnā-sāmāñ se tirā fitna-e-sāmāñ honā

kaun hai jo jī sakegā mo.ajizoñ se sānehe
us nigāh-e-shauq kī ham par mehrbānī ga.ī

nigāh-e-nāz kā rishta jo dil ke ghaav se hai
ye āb-o-rañg-e-tamannā isī lagāv se hai

ā.īna-e-nigāh meñ aks-e-shabāb hai
duniyā samajh rahī hai ki āñkhoñ meñ ḳhvāb hai

safar kaisā faqat āvārgī hai
nahīñ manzil nigāh-e-rāh-rau meñ

dam-bhar ko bhī nigāh na chehre pe Tik sakī
us paikar-e-jamāl kā tevar ajiib thā

vo aate haiñ 'shakīl' ab apne dil se haath dho baiTho
nigāh-e-nāz kī qīmat adā karne kā vaqt aayā

nigāh o dil se ab tafsīr-o-sharh-e-āzrū hogī
zabān o lab se tark-e-iltijā karne kā vaqt aayā

har ik jurm-e-mohabbat us nigāh-e-lutf ke sadqe
naved-e-āfiyat le kar ḳhatā karne kā vaqt aayā

sar-e-rāh siina nikāltā huā aayā thā jo vo ḳhush-nigāh
dil-ishq-ḳhū ko vo par ġhurūr lagā na ho kahīñ yuuñ na ho

haañ ai nigāh-e-garm na kar muḳhtasar hayāt
ham ko hazār bojh abhī haiñ utārne

chalte hī daur-e-jām jo ahl-e-nigāh the
kis kis kī āstīn thī nam dekhte rahe

sarshār-e-nigāh-e-nargis huuñ pā-basta-e-gesu-e-sumbul huuñ
ye merā chaman hai merā chaman maiñ apne chaman kā bulbul huuñ

nigāh rakhte haiñ sayyārgāñ kī nabz pe ham
aur apne chāroñ taraf kitne be-ḳhabar se haiñ

kījiye shāna o ā.īna kī hālat pe nigāh
sīna-sad-chāk koī hai koī hairāñ un kā

niklegī ab na hasart-e-qatl ai nigāh-e-yās
qātil ko rahm aa gayā mujh par ġhazab huā

ḳhabar na thī yahī vaj.h-e-sukūn-e-jāñ hogī
nigāh-e-yār se thiiñ bad-gumāniyāñ kyā kyā

nigāh ham-safaroñ par rakhūñ sar-e-manzil
ki marhala hai ye ik dūsre se Darne kā

nigāh-e-nāz ke do shobade haiñ
'azīz' apnā vajūd apnā adam kyā

bikhar gayā thā jo kal raat kirchiyoñ kī tarah
mirī nigāh vo TuuTā sā ḳhvāb māñge hai