Tags-Nigaah

tū ḳhud hī apnī tarz-e-sitam par nigāh rakh
maiñ kyā kahūñ ye dard-e-jigar mujh se chhīn le

mire taqaddus-e-īmāñ se kheltī hī rahīñ
tirī nigāh kī kāfir-adā.iyāñ kyā kyā

yuuñ dekhnā ki TuuTe na rishta nigāh kā
ik baar dekhne meñ vo sau baar dekhnā

na jaane kitne hijāboñ meñ vo chhupā hai magar
nigāh-e-dil se jo dekhūñ to be-hijāb hai vo

ḳhurshed kī nigāh se shabnam hai mushtahar
vo āshnā hue haiñ to sab āshnā hue

na rahā dhuāñ na hai koī bū lo ab aa ga.e vo surāġh-jū
hai har ik nigāh gurez-ḳhū pas-e-ishti.āl ke darmiyāñ

mere uyuub par rahī har shaḳhs kī nigāh
koī hunar ko dekhne vaalā nahīñ milā

maiñ zindagī se shanāsā huuñ is qadar 'ishrat'
nigāh uThtī thī jis samt hū kā aalam thā

ḳhaas mujh par nahīñ nigāh-e-karam
qā.eda aam hai mohabbat kā

nigāh-e-mast se sāġhar bahut piye tū ne
ab aur hī koī 'maḳhmūr' jaam paidā kar

pūchhā kisī ne mol to hairān rah gayā
apnī nigāh meñ koī kitnā ġharīb thā

uTThe haiñ ab nigāh se parde fareb ke
juz dard-o-ġham ḳhushī kā jahāñ meñ nishāñ kahāñ

na baada hai na surāhī na daur-e-paimāna
faqat nigāh se rañgīñ hai bazm-e-jānāna

ik nigāh-e-karam phir us ke ba.ad
umr bhar kā sitam gavārā hai

apne darshan pe ik nigāh-e-karam
vo ġham-e-zindagī kā maarā hai

har ek zarre meñ har fazā meñ vo husn ban kar samā rahe haiñ
hamārī tāb-e-nigāh ko vo har ā.īna aazmā rahe haiñ

haañ aap ko uThānā paḌegī nigāh-e-lutf
kyā muft apne raaz ko ifshā kareñge ham

apnī nigāh-e-shauq ko rusvā kareñge ham
har dil ko be-qarār-e-tamanā kareñge ham

sharm sī nazar dil kī hai uThtī nahīñ nigāh-e-shauq
ishq kī manziloñ meñ ik manzil-e-infi.āl hai