Tags-Nigaah

ġhair par lutf-e-ḳhās kā iz.hār
mujh se TeḌhī nigāh kyā kahnā

tum na roko nigāh ko apnī
ham kareñ zabt-e-āh kyā kahnā

kis nigāh-e-garm se dekhā hai us ne vaqt qatl
aah ThanDī paḌ ga.ī dam ghuT gayā fariyād kā

baḳhshā hai tū ne merī vafā ko ḳhud apnā rañg
varna mirī nigāh meñ koī sila na thā

badlā ye ruup aap ne kyā bazm-e-ġhair meñ
ab tak mirī nigāh meñ haiñ ajnabī se aap

pā-e-nigāh-e-ahl-e-nazar ke paḌe haiñ niil
ruḳhsār-e-nāznīñ pe nahīñ til alag alag

tū asīr-e-ābrū-e-sheva-e-pindār-e-husn
maiñ giraftār-e-nigāh-e-zindagī-e-muḳhtasar

ik nau-bahār-e-nāz ko taake hai phir nigāh
vo nau-bahār-e-nāz ki hai jān-e-lucknow

likhtā huuñ us parī kī sifat chashm-e-shoḳh kī
tār-e-nigāh-e-hūr ho mistar ke vāste

badal ga.ī hai nigāh-e-sāqī to rañg-e-mahfil badal gayā hai
na ab vo pahlī sī mai-kashī hai na vo mazā ab sharāb meñ hai

paḌī hai bebāk jis pe us ko pilā diyā ek jām-e-mastī
balā kī mastī bharī huī us nigāh-e-mast-e-shabāb meñ hai

āñkhoñ ko ab nigāh kī aadat nahīñ rahī
ab kuchh bhī dekhne kī zarūrat nahīñ rahī

un kī nigāh-e-nāz kā mastāna ho gayā
maiñ hosh meñ kuchh aur bhī dīvāna ho gayā

ye kyā jagah hai dosto ye kaun sā dayār hai
hadd-e-nigāh tak jahāñ ġhubār hī ġhubār hai

ochhī nigāh Daal ke ik samt rakh diyā
dil kyā diyā ġharīb kī sauġhāt ho ga.ī

kah to ga.ī vo nīchī nigāh
raaz hī rakhnā rāz-e-hayāt

aatī nahīñ balā-e-shab-e-ġham nigāh meñ
kis mehr-vash kā jalva nazar meñ samā gayā

nigāh kī bandisheñ salāmat junūñ kī pābandiyāñ musallam
kahīñ bharam khul gayā to ai dil maiñ kyā karūñgā vo kyā kareñge

ḳhauf-o-dahshat se lab nahīñ khulte
varna qātil mirī nigāh meñ hai

us ne kivāḌ khol kar yuuñ hī galī meñ kī nigāh
rahravoñ ke darmiyān Thair ga.ī hai shaam bhī