Tags-Nigaah

taġhāful par na jā us ke taġhāful ek dhokā hai
nigāh-e-dost kī tahrīk-e-pinhānī nahīñ jaatī

tumhāre qaul-o-qasam par fareb kyā khātā
tumhārā tarz-e-amal bhī mirī nigāh meñ thā

'mohsin' mirī nigāh ko achchhā lagā vahī
duniyā kī vo nazar meñ jo achchhā nahīñ to kyā

dekhnā hālat mire dil kī ham-āġhoshī ke vaqt
hai nigāh-e-āshnā terā sar-e-har-mū mujhe

hujūm tishna-labāñ kī nigāh se ojhal
chhalak rahe haiñ sharāb-e-havas ke paimāne

hikāyat-e-ārzū hai nāzuk zabān kyā ḳhaak kah sakegī
lab-e-ḳhamosh-o-nigāh-e-hasrat se dil kī ham guftugū kareñge

tumhīñ se kyā chhupānā hai tumhārī hī to bāteñ haiñ
jo kahtī hai tamannā kī nigāh-e-vāpsīñ mujh se

tirī nigāh ne halkā sā naqsh chhoḌā thā
magar ye zaḳhm to gahrā dikhā.ī detā hai

ba-nigāh-e-sāqī-e-mahr-o-mah kabhī ḳhālī jaam nahīñ rahā
maiñ zamīñ pe DhūñD rahā thā kuchh ki vo kahkashāñ se utar paḌī

jise chāhe mālik-e-rañg-o-bū usī be-ruḳhī meñ navāz de
maiñ idhar thā muntazir-e-karam vo nigāh-e-nāz udhar paḌī

nigāh-e-gulshan meñ jo khaTaktā thā ḳhaar ban ke
gale lagā kar use jo dekhā burā nahīñ thā

kab tak tū saare shahr ko baunā batā.egā
ḳhud par bhī kar nigāh kabhī ā.īna bhī dekh

duā kā TuuTā huā harf sard aah meñ hai
tirī judā.ī kā manzar abhī nigāh meñ hai

tīr-e-nigāh kī jo kamān thī juḌī huī
apnā jigar kabhī to kabhī dil nishāna thā

na chal sakā koī merī nigāh-e-shauq ke saath
tumhāre jalve bhī aa.e to chand gaam aa.e

taḌap rahā hai dil ik nāvak-e-jafā ke liye
usī nigāh se phir dekhiye ḳhudā ke liye

shafaq shafaq mujhe dekhe nigāh-e-husn-e-shu.ūr
naqīb-e-mehr banūñ naġhma-e-sahar meñ rahūñ

majlisoñ kī ḳhaak chhānī to khulā mujh par 'na.īm'
aazmī sā ḳhush-nigāh o ḳhush-bayāñ koī nahīñ

yaañ ham ko diyā kyā jo vahāñ par ho nigāh
taa.at se kuchh ummīd na kuchh ḳhauf-e-gunāh

nigāh meñ koī manzil na koī samt-e-safar
havā ḳhamosh hai kashtī kā bādbāñ chup hai