Tags-Nigaah

ye bad-gumānān-e-anjuman 'shād' kis liye jaan kho rahe haiñ
naqāb uThāne ke ba.ad bhī us nigāh meñ barhamī milegī

tirī nigāh ne thoḌī sī raushnī kar dī
vagarna arsa-e-kaunain meñ añdherā thā

har ek shaḳhs yahāñ bad-gumān tujh se thā
nigāh-e-yār tirā e'tibār kis ne kiyā

badal Daalā hai jis ne merā aalam
kisī kī ik nigāh-e-muḳhtasar hai

kabhī kabhī jo tirī sharm-gīñ nigāh mile
to maiñ banā.ūñ use chheḌ chheḌ kar gustāḳh

mirī nigāh meñ kuchh aur DhūñDne vaale
tirī nigāh meñ kuchh aur DhūñDtā huuñ maiñ

kaam agar aa.e nigāh-e-haq-shanās
phir kisī pahlū koī dhokā nahīñ

maiñ fart-e-ehtiyāt se guzrā magar 'atīq'
us par nigāh az-rah-e-ādāt ho ga.ī

har jumbish-e-nigāh meñ sad-kaif be-ḳhudī
bhartī phiregī husn kī niyyat kahāñ kahāñ

apnī nigāh par bhī karūñ e'tibār kyā
kis maan par kahūñ vo mirā intiḳhāb thā

nigāh-e-mast ne us kī luTā.ī ḳhānqa saarī
paḌā hai barham ab tak kārḳhāna zohd-o-tā.at kā

nigāh-e-yās bhī is said-e-afgan par ġhanīmat hai
nihāyat tañg hai ai said-e-bismil vaqt fursat kā

tujhe dekhā jidhar nigāh ga.ī
thā tasavvur zi-bas tirā hamrāh

pahlū meñ bādshāh ke thā jalva-gar vazīr
sardār-e-dīñ alī-e-valī ḳhalq kā amiir

jidhar nigāh uThāo ravāñ hai ḳhūn-e-jigar
ḳhabar nahīñ ki ye kyā ho gayā zamāne ko

tirī nigāh mire ġham kī pāsdār sahī
mirī nigāh meñ ġham hī nahīñ kuchh aur bhī hai

ye samajh lo ki rag-e-jāñ meñ hai zahrāb-e-junūñ
jab nigāh-e-karam-o-lutf se bhī dil dukh jaa.e

na jaane in dinoñ kyā ho gayā hai saaqī ko
nigāh-e-rind meñ husn-e-talab nahīñ paḌhtā

ḳhirām vo jo hilā de jigar farishtoñ kā
nigāh vo jo ulaT de safoñ ko mahshar kī

isī taraf tire qurbāñ nigāh-e-sharm-ālūd
mujhī pe tez ho ye baaḌh kund ḳhanjar kī