Tags-Nigaah

nigāh-e-shauq kī hairāniyoñ ko kyā kahiye
unheñ bulā bhī liyā e'tibār bhī na kiyā

maiñ apne shahr meñ phirtā huuñ ajnabī kī tarah
ajab nigāh se taktā hai mujh ko har koī

ḳhanjar-e-bismil suuñ dil kuuñ nīm-bismil jab kiyā
yak nigāh-e-lutf suuñ kar puḳhta is kā kār-e-ḳhām

terī nigāh to is daur kī zakāt huī
jo mustahiq hai usī tak nahīiñ pahuñchtī hai

aa gayā ġhash nigāh dekhte hī
mudda.ā kab zabān se niklā

munharif ham dekhte haiñ kuchh nigāh-e-tez tez
kis rag-e-jāñ se huā hai ye sar-e-nashtar ḳharāb

ik ḳhvāb-numā tamsīl kā dhundlā aks hai ā.īna-ḳhāne meñ
vo husn dikhā.ī nahīñ detā aur phir bhī nigāh nahīñ haTtī

tujhe qarīb se dekhā to dil ne sochā hai
ki terā husn bhī ik zāviya nigāh kā thā

tujhe tarāsh ke dil meñ sajā liyā maiñ ne
qusūr is meñ mirī rif.at-e-nigāh kā thā

manzar had-e-nigāh talak laal laal hai
har samt se green color le gayā koī

nigāh-e-nāz ko terī maiñ sharminda na dekhūñgā
haTā.e letā huuñ apnī nazar achchhā na dekhūñgā

merī nigah meñ yaar maiñ us kī nigāh meñ
zarre meñ māhtāb hai zarra hai maah meñ

maiñ us kā said-e-husn vo merā shikār-e-ishq
us kī nigāh mujh pe vo merī nigāh meñ

merī nazar meñ tum ho tumhārī nazar meñ maiñ
merī nigah meñ tum maiñ tumhārī nigāh meñ

kyā dekhtā hai mujh ko sarāpā huuñ chashm-e-shauq
merī nigāh tujh pe tū merī nigāh meñ

tujhe hai apnī ibādat upar nazar kyūñkar
maiñ us ke fazl ke uupar nigāh kartā huuñ

na āfrīñ na dilāsā na dil-dahī na nigāh
ġharaz maiñ hī huuñ jo tujh se nibāh kartā huuñ

bebāk haiñ ki jaan ke pahchānte nahīñ
merī nigāh-e-rañg-e-tamannā liye hue

aatī hai kis dimāġh se ik ik nigāh-e-husn
dil meñ hazār fitna-e-barpā liye hue