Tags-Nigaah

un kī nigāh-e-mast ke qurbān jā.iye
mere junūñ ko hāsil-e-mai-ḳhāna kar diyā

nigāh-e-tishna se hairat kā baab dekhte haiñ
bisāt-e-āb pe raqs-e-sarāb dekhte haiñ

abhī vasīl-e-iz.hār DhūñDhtī hai nigāh
abhī savāl kahāñ hasrat-e-savāl meñ huuñ

vo ḳhvāb dekhe zamāna guzar gayā lekin
sulag rahe haiñ darīche nigāh ke ab tak

haiñ aaj tak nigāh meñ hālāñki aaj tak
dekhā na phir kabhī unheñ ik baar dekh kar

aane lagī hai ishq ko ġhairat par apnī sharm
shāyad tirī nigāh ko bezār dekh kar

ham bhī ḳhud ko tabāh kar lete
tum idhar bhī nigāh kar lete

kisī gumāñ kisī imkāñ kā ruḳh nahīñ kartī
nigāh jalva-e-arzāñ kā ruḳh nahīñ kartī

nigāh-e-nāz se saaqī kā dekhnā mujh ko
mirā vo haath meñ sāġhar uThā ke rah jaanā

ḳhushā ki ahd-e-qafas meñ bhī zindagī ke liye
nigāh kheltī rahtī hai āshiyāne se

mire junūñ ko mohabbat se dekhne vaale
zarā nigāh bachā.e hue zamāne se

ye kyā jagah hai dosto ye kaun sā dayār hai
had-e-nigāh tak jahāñ ġhubār hī ġhubār hai

gardan jhukī huī hai uThāte nahīñ haiñ sar
Dar hai unheñ nigāh laḌegī nigāh se

insāf bhī yahī hai yahī shān-e-husn bhī
haañ haañ nazar churāo qatīl-e-nigāh se

un kī hayā o sharm ne rakkhī hai dil kī sharm
kyā hogā jab nigāh milegī nigāh se

kyā hai ki aaj chalte ho katrā ke raah se
dekho idhar nigāh milā kar nigāh se

mirī pyaas baḌh rahī hai mirā dil sulag rahā hai
jo nahīñ hai jaam saaqī to nigāh se pilā de

māyūs kar diyā thā kisī ke fareb ne
bujhtī huī nigāh meñ chehra koī na thā

jab koī kisī kā haath pakaḌ kar sair ko bāhar jaatā hai
jab koī nigāh-e-shauq ke aage rah rah kar ghabrātā hai

mujh tak nigāh aa.ī jo vāpas palaT ga.ī
phailā jo merā shahr to pahchān ghaT ga.ī