Tags-Nigaah

nigāh arz-o-samā meñ jo maiñ ne dauḌā.ī
khiñchā huā mujhe chāroñ taraf hisār lagā

kiyā huuñ tark nargis kā tamāshā
talab-gār-e-nigāh-e-bā-hayā huuñ

qibala-e-maqsad-e-nigāh-e-niyāz
phir vahī parda-e-amārī hai

hai tamāshā ba-qadr-e-zauq-e-nigāh
dekhtā huuñ jidhar udhar kuchh hai

ham bhī nigāh-e-dost se nā-āshnā nahīñ
har inqilāb-e-gardish-e-daurāñ nazar meñ hai

ham jo khaTak rahe the tumhārī nigāh meñ
lo ab tumhārī raah meñ dīvār ham nahīñ

koī us par nigāh kyā Daale
tamkanat pāsbān hai goyā

sar-e-bazm merī nazar se jab vo nigāh-e-hosh-rubā milī
kabhī zindagī kā maza milā kabhī zindagī kī sazā milī

ga.e manzaroñ se ye kyā uḌā hai nigāh meñ
koī aks hai ki ġhubār sā hai nigāh meñ

nigāh rakhte haiñ saaqī vo terī āñkhoñ par
sukūn-e-dil ke jo pyāle talāsh karte haiñ

hai dil meñ aag to āñkhoñ meñ lāla-zār 'jigar'
nigāh-e-nāz ke andāz koī kyā jaane

nigāh ko bhī mayassar hai dil kī gahrā.ī
ye tarjumān-e-mohabbat hai be-zabāñ na kaho

adā.eñ bāñkī ajab tarah kī vo tirchhī chitvan bhī kuchh tamāsha
bhañveñ vo jaise khiñchī kamāneñ palak sināñ-kash nigāh bhālā

nigāh-o-dil se guzrī dāstāñ tak baat jā pahuñchī
mire hoñToñ se niklī aur kahāñ tak baat jā pahuñchī

allāh re un butoñ kī āñkheñ
kāfir jaadū nigāh kyā haiñ

dhūmeñ teġh-e-nigāh kī haiñ
tevar ai kaj-kulāh kyā haiñ

kirneñ to ik nigāh-e-subuk-rau kī lahr haiñ
dumbāla-dāri-e-shab-e-mahtāb aur hai

nigāh-e-mast-e-sāqī bāda-ḳhvāroñ se ye kahtī hai
butoñ kī jab nazar se gir paḌo yād-e-ḳhudā karnā