Tags-Nigaah

har shakl meñ thā vahī numūdār
ham ne hī nigāh-e-sarsarī kī

husn ko bhī kahāñ nasīb 'jigar'
vo jo ik shai mirī nigāh meñ hai

junūñ meñ aql kī saudāgarī bhī kī maiñ ne
nigāh-e-nāz se duniyā badal rahā huuñ maiñ

vo dekhte hī nahīñ jo hai manzaroñ se alag
kabhī nigāh ko hairān kyuuñ nahīñ karte

ye baat ajiib nigāh meñ aa.ī hai
har tarah se jo ḳhayāl ko bhaa.ī hai

nashr-e-jafā-o-jaur bhī hai ik adā-e-ḳhās
husn-e-nigāh-e-lutf se maiñ be-ḳhabar nahīñ

husn-e-nigāh-o-kam-nazarī meñ ye farq hai
sab bā-hunar haiñ aur koī bā-hunar nahīñ

ye bhī ik raat kaT hī jā.egī
sub.h-e-fardā kī muntazir hai nigāh

vo nīm-shab vo javāñ husn vo vufūr-e-niyāz
nigāh o dil ne jo kī haiñ ibādateñ mat pūchh

kisī nigāh kī nas nas meñ tairte nishtar
vo ibtidā-e-mohabbat kī rāhateñ mat pūchh

le hī to legī dil nigāh tirī
har tarah hoshiyār ham bhī haiñ

kyā mirī aarzū se vāqif hai
vo nigāh-e-daqīqa-ras mat pūchh

nigāh-e-ishq dil-e-zinda kī talāsh meñ hai
shikār-e-murda sazā-vār-e-shāhbāz nahīñ

sukūt-e-shām kā manzar badalne vaalā hai
mirī nigāh kā hai aks paara paara kuchh

anmol vo guhar haiñ jahāñ kī nigāh meñ
dariyā kī jo tahoñ se nikāle hue nahīñ

kisī ke sāmne is tarah surḳh-rū hogī
nigāh ḳhūn-e-tamannā se bā-vazū hogī

sarisht-e-husn ajab hai ki vasl ke hañgām
nigāh-e-yār meñ kaifiyyat-e-raqīb bhī thī

ab sūrat-e-hāl ban gayā huuñ
miltā huuñ nigāh-e-chārāgar meñ

mele meñ ye nigāh tujhe DhūñDtī rahī
har mah-jabīñ se terā pata pūchhtī rahī

nigāh-e-sāqī kī muskurā.ī kahā jab 'aḳhtar' ne apnī dhan meñ
piyeñge piite raheñge mai-kash magar ye ḳhāna-ḳharāb pahle