Tags-Nigaah

murġh-e-dil par nigāh hai un kī
aisī dekhī nahīñ shikārī aañkh

jānib-e-dar nigāh-e-hasrat hai
kis kī kartī hai intizārī aañkh

bijlī kā naam sunte hī āñkheñ jhapak ga.iiñ
rokegī merī aah kī kyā ye nigāh choT

dil par lagā rahī hai vo nīchī nigāh choT
phir choT bhī vo choT jo hai be-panāh choT

ḳhudā rakhe tirī āñkhoñ kī dil-navāzī ko
tirī nigāh mirī umr bhar kī daulat hai

muddat ke ba.ad us ne jo kī lutf kī nigāh
jī ḳhush to ho gayā magar aañsū nikal paḌe

dil pe Daalī hai kisī ne phir nigāh
saañs phir aane lagī jaane lagī

ye māntā huuñ adab shart-e-ishq hai lekin
ye hosh kis ko rahegā nigāh-e-yār ke ba.ad

tum apne rañg nahāo tum apnī mauj uḌo
magar hamārī vafā bhī nigāh meñ rakhnā

pursish-e-ġham pe haath se dāman-e-zabt chhuT gayā
mehr-e-nigāh-e-yār ne luuT liyā luTā diyā

havādisāt ke maare sa.ūbatoñ meñ pale
nigāh-e-garm se tarsāñ hoñ bijliyoñ ke jale

idhar se dast o nigāh o zabāñ tamām savāl
udhar se ek sukūt-e-girāñ javāb meñ thā

baġhaur dekh rahā hai adā-shanās mujhe
bas ab zalīl na kar ai nigāh-e-yās mujhe

khaḌe kab se ham sar-e-rāh haiñ kahīñ mar chukeñ ki tabāh haiñ
hadaf-e-ḳhadañg-e-nigāh haiñ zarā aañkh idhar bhī milā.iye

mujhe bhī lamha-e-hijrat ne kar diyā taqsīm
nigāh ghar kī taraf hai qadam safar kī taraf

us badaltī nigāh se pūchho
ishq kā mo'atabar usuul haiñ ham

shukr-e-nigāh-e-nāz kiye jā rahā huuñ maiñ
fitrat ko kārsāz kiye jā rahā huuñ maiñ

tarz-e-bayāñ to be-qayās the tire ġham-zadoñ ke paas
bol uThī nigāh-e-yās band agar zabāñ huī

dikhātī hai kabhī bhālā kabhī barchhī lagātī hai
nigāh-e-nāz-e-jānāñ ham ko kyā kyā āzmātī hai

shu.ūr-e-zīst nā-mumkin nahīñ hai
nigāh maut ko sharmā chukī huuñ