Tags-Nigaah

dekhne meñ vo nigāh-e-lutf thī
kis se pūchheñ zaḳhm-e-dil kyūñkar khulā

ham haiñ mata-e-kūcha-o-bāzār kī tarah
uThtī hai har nigāh ḳharīdār kī tarah

shu.ūr-e-puḳhta kī ḳhair ho jis ne zindagī ko bachā liyā hai
tirī nigāh-e-karam-numā ne diyā to thā umr-bhar kā dhokā

āñkhoñ meñ bas ga.ī hai vo tasvīr is tarah
merī nigāh-e-shauq bhī tasvīr ho na jaa.e

manzar ye hashr-ḳhez jo pesh-e-nigāh hai
Dartā huuñ mere ḳhvāb kī tābīr ho na jaa.e

inhīñ kā naam mohabbat inhīñ kā naam junūñ
mirī nigāh ke dhoke tirī nazar ke fareb

ho rāhzan kī hidāyat ki rāhbar ke fareb
mirī nigāh ne khaa.e nazar nazar ke fareb

dil-zadagāñ ke qāfile duur nikal chuke tamām
un kī talāsh meñ nigāh ab jo ga.ī to kyā ga.ī

shāyad kisī adū ne tire kaan bhar diye
varna nigāh yuuñ to churātā nahīñ koī

jis meñ zarā bhī kibr kā hotā hai shā.iba
us ko nigāh meñ kabhī laatā nahīñ koī

tālib huuñ maiñ us ek nigāh-e-do-asar kā
jo hosh meñ lā kar mujhe dīvāna banā de

dil churātī hai yuuñ nigāh-e-nāz
aur mujh ko ḳhabar nahīñ hotī

nigāh-e-nāz ke tālib haiñ rahguzar meñ tirī
isī firāq meñ dhūnī ramā.e baiThe haiñ

saaqī zarā nigāh milā kar to dekhnā
kambaḳht hosh meñ to nahīñ aa gayā huuñ maiñ

talāsh meñ huuñ tavāzun kahīñ nahīñ miltā
har ek chehra ko merī nigāh taultī hai

ai dil apnī tū chaah par mat phuul
dilbaroñ kī nigāh par mat phuul

nigāh jis kī mirī samt aaj tak na uThī
mire sivā vo kisī shai ko dekhtā bhī nahīñ

āñkhoñ meñ zindagī ke tamāshe uchhāl kar
ai ġhurbat-e-nigāh na itne savāl kar

ye kaisī machhliyāñ haiñ chamaktī haiñ raat bhar
ye jhiil hai ki ek nigāh-e-hasīñ hai shaam

maiñ kā.enāt pe apnī nigāh Dāltā huuñ
tire ḳhayāl kī miltī hai jab ziyā mujh ko