Tags-Nigaah

qātil nigāh-e-yās kī zad se na bach sakā
ḳhanjar the ham bhī ik tah-e-ḳhanjar liye hue

na thī haal kī jab hameñ ḳhabar rahe dekhte auroñ ke aib o hunar
paḌī apnī burā.iyoñ par jo nazar to nigāh meñ koī burā na rahā

hameñ ab aañkh ke manzar kā e'tibār nahīñ
so ham ab aks nahīñ bas nigāh dekhte haiñ

tanhā.iyāñ bichhā ke jahān-e-ḳharāb meñ
mere liye nigāh kā sāmāñ kiyā gayā

taġhāful-mashrabī se nā-tamāmī bas-ki paidā hai
nigāh-e-nāz chashm-e-yār meñ zunnār-e-mīnā hai

dekh nigāh-e-shauq se husn-o-jamāl kā jahāñ
jalva hī jalva chār-sū husn-e-nazar-navāz se

mujh par surūr chhā gayā bāda-e-dil-navāz se
duniyā mirī badal ga.ī ek nigāh-e-nāz se

nigāh paak hai terī to paak hai dil bhī
ki dil ko haq ne kiyā hai nigāh kā pairav

gardan muḌī nigāh laḌī baat kuchh na kī
shoḳhī to ḳhair aap kī tamkīñ balā kī hai

jitne gile the un ke vo sab dil se dhul ga.e
jhepī huī nigāh talāfī jafā kī hai

use dekhne kī thī aarzū mujhe us kī thī baḌī justujū
magar us ke āriz-e-nāz pe mirī har nigāh phisal ga.ī

nazzāra-e-nigāh hai ye jaltā-bujhtā din
kuchh ġham nahīñ jo raat kī dāvat badal ga.ī

tirī nigāh kiran thī to merā dil shabnam
tirī nigah se bhī dil kā mo.āmla na huā

jo dil meñ thī nigāh sī nigāh meñ kiran sī thī
vo dāstāñ ulajh ga.ī vazāhatoñ ke darmiyāñ

jurm-e-vafā se andalīb-e-gul kī nazar meñ thī zalīl
kāñToñ ke bhī nigāh meñ honā paḌegā ḳhvār kyā

uTh ga.ī jis taraf nazar hashr sā ik bapā huā
un kī nigāh-e-nāz hai fitna-e-rozgār kyā

haTtā nahīñ nigāh-e-alamnāk se kabhī
chehra koī ḳhumār-e-tarab se bharā huā

aa.ina paikar-e-tasvīr nigāh-e-mushtāq
jise dekhā tirī mahfil meñ vo hairāñ niklā

ba-qadr-e-dīd na the terī anjuman ke charāġh
mirī nigāh farozāñ huī hai ban ke charāġh

tavassul se tire dil meñ bharūñgā quvvateñ barqī
zarā merī taraf bhī ai nigāh-e-yār ho jaanā