Tags-Nigaah

shakar-lab ne nigāh-e-dilbarī siiñ
kiyā mujh par ināyat be-nihāyat

faqīr bhī mutarassid nigāh-e-lutf kā hai
idhar bhī 'rind' mirā shahryār dekh chuke

ishq kī betābiyoñ par husn ko rahm aa gayā
jab nigāh-e-shauq taḌpī parda-e-mahmil na thā

maiñ jab makān ke bāhar qadam nikāltā huuñ
ajab nigāh se mujh ko makān dekhtā hai

badleñ zarā nigāh ke andāz aap bhī
uTThe haiñ kuchh usuul vafā ke badal ke ham

DhūñDhtī rahtī hai har lamha nigāh-e-dahshat
aur kis shahr-e-mohabbat meñ amaañ baaqī hai

turfa fusūñ-sarisht hai chashm-e-karishma-sanj-e-yār
letī hai ik nigāh meñ sabr bhī aur qarār bhī

phir vahī vo the vahāñ kuchh bhī na thā
jis taraf dekhā nigāh-e-nāz se

sirf tū ne nigāh pherī hai
moḌ sā aa gayā kahānī meñ

kyā ho rahā hai dil pe asar un kā kyā kaheñ
jalve jo haiñ nigāh ko hairāñ kiye hue

nigāh-e-nāz ne un kī mujhe ik armuġhāñ baḳhshā
milā darbār-e-ulfat se shu.ūr-e-zindagī mujh ko

mirī nigāh kahāñ tak javāb de āḳhir
tirī nigāh kā har har savāl mub.ham hai

kab se haiñ riñd muntazir chashm-e-karam pe hai nazar
shoḳh nigāh ke liye vaj.h-e-takallufāt kyā

merī nigāh-e-shauq bhī kuchh kam nahīñ magar
phir bhī tirā shabāb tirā hī shabāb hai

ilāhī ḳhair karnā der se phir
bahut muztar nigāh-e-rāzdāñ hai

maiñ nigāh-e-pāk se dekhe thā tire husn-e-pāk ko is pe bhī
mire jī meñ ḳhvāhish-e-vasl thī tire dil meñ bos-o-kanār thā

adāoñ ne lubhāyā dī nigāh-e-nāz ne dāvat
magar alfāz dil-shikanī meñ merī kāmrāñ nikle

dekhī hai jab se aañkh kisī kī phirī huī
aalam mirī nigāh meñ begāna ho gayā

bar-sar-e-lutf aaj chashm-e-dil-rubā thī maiñ na thā
DhūñDhtī mujh ko nigāh-e-āshnā thī maiñ na thā

tamām lashkar-e-aql-o-nigāh khet rahā
bisāt-e-ishq pe sultān rah gayā hai bas