Tags-Nigaah

agarche tīr-e-palak ne kiyā thā dil barmā
vale nigāh ke ḳhanjar ne ḳhuub kaam kiyā

tirī nigāh-e-talattuf ne faiz aam kiyā
ḳhirad ke shahr ke sab vahshiyoñ kuuñ raam kiyā

mujhe nigāh-e-taġhāful raqīb par altāf
adā-e-maslahat-āmez ne ġhulām kiyā

jalve mirī nigāh meñ kaun-o-makāñ ke haiñ
mujh se kahāñ chhupeñge vo aise kahāñ ke haiñ

dil kī bisāt kyā thī nigāh-e-jamāl meñ
ik ā.īna thā TuuT gayā dekh-bhāl meñ

mujhe nahīñ kisī uslūb-e-shā.irī kī talāsh
tirī nigāh kā jaadū mire suḳhan meñ rahe

hameñ shu.ūr-e-junūñ hai ki jis chaman meñ rahe
nigāh ban ke hasīnoñ kī anjuman meñ rahe

vo gar nigāh milā le to mo.ajiza kar de
isī liye to udhar ham sambhal ke dekhte haiñ

libās-e-māh meñ 'ehsān' dekh kaun aayā
nigāh-e-sū-e-falak ḳhānumāñ-ḳharāb uThā

allāh-re ishtiyāq nigāh-e-umīd kā
kho.e ho.uuñ kī yaad meñ pur-nam na ho sakī

kitne rumūz-e-shauq in āñkhoñ meñ rah ga.e
jin se nigāh-e-dost bhī mahram na ho sakī

ziyāñ-pasand hamārā mizāj hai varna
nigāh ham bhī zamāna-shanās rakhte haiñ

nigāh-e-shauq hai aur un ke jalve
shikast-e-nāgaghāñ hai aur maiñ huuñ

nuqta banī nigāh se ojhal huī zamīñ
sar par ik āsmān thā vo bhī nahīñ rahā

basān-e-ā.ina ham ne to chashm vā kar lī
jidhar nigāh kī saaf us ko barmalā dekhā

nigāh bhar ke tumheñ dekhne kī hasrat hai
magar hamārī nigāhoñ meñ itnī taab kahāñ

nigāh o dil pe khulī haiñ haqīqateñ kaisī
ye dil udaas ziyāda hai shādmāñ kam hai

mirī nigāh kī vus.at bhī is meñ shāmil kar
mirī zamīn pe terā ye āsmāñ kam hai

vafā nigāh kī tālib hai imtihāñ kī nahīñ
vo merī ruuh meñ jhāñke na āzmā.e mujhe

use mohabbat hai ham se lekin kabhī zabāñ se kahā nahīñ hai
nigāh paḌhne meñ ham haiñ māhir use ye shāyad patā nahīñ hai