Tags-Nigaah

muusā ke sar pe paañv hai ahl-e-nigāh kā
us kī galī meñ ḳhaak aḌī koh-e-tūr kī

yaañ zaḳhmī-e-nigāh ke jiine pe harf hai
hai dil par apne zaḳhm ki siine pe harf hai

tum zaḳhm-e-dil kī mere ḳhabar pūchhte ho kyā
tīr-e-nigāh dil ke to ab vār-pār hai

yuuñ tū har chhab vo nirālī vo fusūñ-sāz ki bas
haa.e vo ek nigāh-e-ġhalat-andāz ki bas

vafā kī tash.hīr karne vaalā fareb-gar hai sitam to ye hai
nigāh-e-yārāñ meñ phir bhī vo shaḳhs mo'tabar hai sitam to ye hai

kyā kare rah ke vo ḳhadañg-e-nigāh
ab lahū kā bhī kaal hai dil meñ

zaḳhm-e-nigāh zaḳhm-e-hunar zaḳhm-e-dil ke ba.ad
ik aur zaḳhm tujh se bichhaḌ kar milā mujhe

paḌī hai ik nazar jis par vo be-ḳhud ho gayā 'kaifī'
nigāh-e-mast-e-sāqī meñ hai kyā tāsīr-e-mai-ḳhāna

dil aur vo bhī sirf mirā dardmand dil
terī nigāh ne ye kiyā intiḳhāb kyā

vo ik nigāh dekh ke ḳhud bhī haiñ sharmsār
nā-āgahī meñ yūñhī ik afsāna ban gayā

mirī nigāh kā paiġhām be-sadā jo huā
vo merī baat sune kyuuñ maiñ be-navā jo huā

merī nigāh-e-shauq bhī kuchh kam nahīñ magar
phir bhī tirā shabāb tirā hī shabāb hai

dil mushabbak ho gayā tīr-e-nigāh-ḳhāna se
ab tumhārī yaad ke aane ko lākhoñ ghar bane

nigāh barq nahīñ chehra āftāb nahīñ
vo aadmī hai magar dekhne kī taab nahīñ

phir ek saaya dar-o-bām par utar aayā
dil-o-nigāh meñ phir zikr chhiḌ gayā us kā

nigāh-e-bad-gumāñ hai aur maiñ huuñ
fareb-e-āshiyāñ hai aur maiñ huuñ

jazb ho kar rah ga.e ḳhud hī nigāh-e-barq meñ
kyūñkar āñkhoñ se nasheman apnā jaltā dekhte

ye taar taar shab-o-roz reza reza hayāt
maiñ apne haal par āḳhir nigāh kyā kartā

tirī be-ruḳhī kī nigāh thī ki jo har ḳhatā se barī rahī
mirī aarzū kī sharāb thī ki jo jaam jaam bharī rahī