Tags-Nigaah

nigāh pher lī us ne chhupā liye aañsū
magar balā kī kashish thī us ik nazāre meñ

zarroñ meñ kyā nahīñ hai jo hai mehr-o-māh meñ
pastī nigāh meñ hai bulandī nigāh meñ

duniyā gunāhgār hai terī nigāh meñ
zāhid hai terā zo.am bhī dāḳhil gunāh meñ

kāñToñ pe chal rahā huuñ mohabbat kī raah meñ
kis husn kī bahār hai merī nigāh meñ

kaunain meñ samā.e na 'ārif' vo husn jab
kis kā hai zarf rakh sake us ko nigāh meñ

har manzil-e-hayāt se guzrā chalā gayā
har marhale pe aap the merī nigāh meñ

allāh re iztirāb-e-tamannā-e-dīd-e-yār
fursat meñ ik nigāh kī sau baar dekhnā

maiñ to jabīn-e-shauq par likhtā gayā use
vo bhī nigāh-e-nāz se paḌhtā rahā mujhe

agarche dil ko le saath apne aayā ashk mirā
nigāh meñ tirī hargiz na bhāyā ashk mirā

ik tirī hī nigāh meñ na jache
shahar meñ varna aabrū thī bahut

ik uchaTtī sī taġhāful kī nigāh
hīla-e-arz-e-mohabbat kyā hai

na dil churāte hamārā na tum ḳhajil hote
pa.e-hijāb hai nīchī nigāh kī taḳhsīs

na thī haal kī jab hameñ apne ḳhabar rahe dekhte auroñ ke aib o hunar
paḌī apnī burā.iyoñ par jo nazar to nigāh meñ koī burā na rahā

taklīf-e-iltifāt na kar ai nigāh-e-nāz
ab mutma.in haiñ apne ġham-e-zindagī se ham

nigāh-e-yār ne kuchh aise aib DhūñDh liye
tamām kār-e-mohabbat dobāra karnā paḌā

dil-o-nigāh pe kyuuñ chhā rahā hai ai saaqī
ye terī aañkh kā nashsha sharāb se pahle

tumhāre va.az meñ tāsīr to hai hazrat-e-vā.iz
asar lekin nigāh-e-nāz kā bhī kam nahīñ hotā

vārasta-e-azāb-e-tamāshā hai chashm-e-barg
ai āgahī nigāh mirī kor kyuuñ nahīñ

tirī nigāh-e-mohabbat kā aasrā pā kar
fasāna-e-sitam-e-rozgār kahtā huuñ

har rañg se payām utarte haiñ ruuh meñ
paḌtī hai jab nigāh dhanak ke jhukāv par