Tags-Aitbaar

dil balā se nisār ho jaa.e
aap ko e'tibār ho jaa.e

jise dil maan letā hai
vahī hai e'tibār 'āzar'

na ishtiyāq-e-nazāra na e'tibār-e-jamāl
Thahar ga.ī hai kahāñ zindagī ḳhudā jaane

na koī din na koī raat intizār kī hai
ki ye judā.ī bharose kī e'tibār kī hai

fitrat har e'tibār se hai ham-navā-e-husn
āmīn tum ko to duā.eñ asar kareñ

na.e ġham baḳhshtā hai dil ko bahlā.e bhī jaatā hai
ġharaz vo e'tibār-e-ġham kabhī khone nahīñ detā

is e'tibār pe kaaTī hai ham ne umr-e-azīz
sahar kā vaqt ujāle bhī saath lā.egā

mastī meñ raat vo na khule mujh se ham-nashīñ
kuchh e'tibār-e-nashsha-e-sahbā nahīñ rahā

choTTe dil ke haiñ butāñ mash.hūr
bas yahī e'tibār rakhte haiñ

duniyā to ham se haath milāne ko aa.ī thī
ham ne hī e.atibār dobāra nahīñ kiyā

aañch dāmān-e-sabā se aa.ī
e.atibār-e-gul-e-tar yaad aayā

kisī kī āñkhoñ kā zikr chheḌeñ ajiib kuchh pur-vaqār āñkheñ
magar ḳhudā vāsta na Daale baḌī hī be-e'tibār āñkheñ

phir is ke ba.ad hai ḳhud par yaqīñ na duniyā par
thī aisī baat hī ik pal ke e'tibār meñ kuchh

kyā tum pe e'tibār kareñ tum hī kuchh kaho
qaul-o-qarār karte ho sarkār kī tarah

ahd-e-azal pe zindagiyoñ kā madār hai
aalam tamām ġham-kada-e-e'tibār hai

ai maut tujh pe umr-e-abad kā madār hai
tū e'tibār-e-hasti-e-be-e'tibār hai

ab kis ko e'tibār ki tū bevafā nahīñ
ab kis ko intizār magar intizār hai

hazār daftar-e-ma.anī khañgāl Daale 'nāz'
magar kahīñ bhī koī harf-e-e'tibār na thā