Tags-Pani

bastī ke gharoñ ko kyā dekhe buniyād kī hurmat kyā jaane
sailāb kā shikva kaun kare sailāb to andhā paanī hai

har mauj meñ giryāñ rahtā hai girdāb meñ raqsāñ rahtā hai
betāb bhī hai be-ḳhvāb bhī hai ye kaisā zinda paanī hai

betāb havā ke jhoñkoñ kī fariyād sune to kaun sune
maujoñ pe taḌaptī kashtī hai aur gūñgā bahrā paanī hai

baiThe haiñ sunahrī kashtī meñ aur sāmne niilā paanī hai
vo hañstī āñkheñ pūchhtī haiñ ye kitnā gahrā paanī hai

ye raaz samajh meñ kab aatā āñkhoñ kī namī se samjhā huuñ
is gard-o-ġhubār kī duniyā meñ har chiiz se sachchā paanī hai

is bastī meñ is dhartī par sairābī-e-jāñ kā haal na pūchh
yaañ āñkhoñ āñkhoñ aañsū haiñ aur dariyā dariyā paanī hai

maiñ vo TuuTā huā taarā jise mahfil na raas aa.ī
maiñ vo shola jo shab bhar aañkh ke paanī meñ rahtā hai

tūfān uThāoge kabhī apne jahāñ meñ
yā aañkh ke paanī hī ko sailāb kahoge

tū sabz jhiil ke paanī meñ DhūñDtā hī rahe
maiñ chāñd ok meñ bhar luuñ kamāl kar jā.ūñ

ḳhud meñ utre aur tuġhyānī se bāhar aa ga.e
aa ke gahrā.ī meñ ham paanī se bāhar aa ga.e

ravānī meñ nazar aatā hai jo bhī
use taslīm kar lete haiñ paanī

maiñ jahāñ Duubā vahāñ buniyād-e-sāhil paḌ ga.ī
āḳhirī sāñsoñ ne paanī par jazīra likh diyā

lahū dil kā mirī āñkhoñ kā paanī ban ke kahtā hai
na ham hoñge na tum hoge hamārī dāstāñ hogī

ai girya na rakh mere tan-e-ḳhushk ko ġharqāb
lakḌī kī tarah paanī meñ gal jaa.e to achchhā

maiñ nadī paar karūñ soch rahā huuñ 'bānī'
mauj masrūf hai paanī ko bhañvar dene meñ

dil bhar aa.e to samundar nahīñ dekhe jaate
aks paanī meñ utar kar nahīñ dekhe jaate

habāb un ko na samjho yaaro ye uThte paanī meñ haiñ jo har-dam
badan khulā jo kisī kā dekhā khule haiñ ye īda-e-dariyā

na jhaTko zulf se paanī ye motī TuuT jā.eñge
tumhārā kuchh na bigḌegā magar dil TuuT jā.eñge

phir nazar ā.eñge aglī manziloñ ke pech-o-ḳham
dekh paanī meñ utar kar haath ko patvār kar

maiñ ne to tum se kī hī nahīñ koī aarzū
paanī ne kab kahā thā ki sharbat karo mujhe