Tags-Pani

hazār karvaTeñ jhankār hī sunātī haiñ
yuuñ jhaTpaTāne se zanjīr hogī paanī kyā

in ke paanī se kyā bujhegī pyaas
ye ghaḌe to bahut hī kachche haiñ

gahrī ḳhamosh jhiil ke paanī ko yuuñ na chheḌ
chhīñTe uḌe to terī qabā par bhī ā.eñge

kūza-e-harf meñ laayā huuñ tumhārī ḳhātir
ruuh par utre hue ek ajab paanī ko

pilāyā saañp ko paanī jo man nikāl liyā
nahāne baiThe haiñ choTī se khol kar ta.avīz

vo ham nahīñ jo hoñ dīvāne aise kāmoñ se
kise pilāte ho paanī meñ ghol kar ta.avīz

vo itr-e-ḳhāk ab kahāñ paanī kī baas meñ
ham ne badal liyā hai piyāla gilās meñ

so ab ye jīvan kī naav shāyad kisī kināre se jā lagegī
ki ab to paanī kī sat.h par bhī gumān hone lagā zamīñ kā

ye to hāthoñ kī lakīroñ meñ thā girdāb koī
itne se paanī meñ agar ho gayā ġharqāb koī

pal pal rañg badaltī duniyā meñ ai dost
apne ḳhuun se to paanī bhī mahñgā hai

naag ban jā.eñgī paanī kī sharābī lahreñ
aag phailā.egā sailāb-e-chinhāñ tere ba.ad

ab to is tālāb kā paanī badal do
ye kañval ke phuul kumhlāne lage haiñ

khetiyāñ suukh ga.iiñ ḳhushk hue dil ke nagar
bāvar aayā hameñ paanī kā havā ho jaanā

mrs. iqbāl paanī maañg ke piitī haiñ shauhar se
phir is ke ba.ad kahtī haiñ piyā meñ kuchh nahīñ rakkhā

maiñ paanī aur aag se ik miTTī kī ḳhātir lauTā thā
aur ye donoñ aalam khel-tamāshā dekhne vaale the

Thahre Thahre paanī meñ giit sarsarāte haiñ
bhīge bhīge jhoñkoñ meñ ḳhushbuoñ kā Derā hai

itnā royā huuñ maiñ us kī yādoñ meñ
saarā paanī khārā hone vaalā hai

in meñ sachche motī bhī haiñ, in meñ kañkar patthar bhī
in meñ uthle paanī bhī haiñ, in meñ gahre sāgar bhī

haañ
maiñ usī paanī kī buuñd huuñ

āñkheñ dhote haiñ sone ke paanī se
jāgte hī jo tum ko dekhā karte haiñ