Tags-Partition

mohabbat nā-ravā taqsīm kī qaa.el nahīñ phir bhī
mirī āñkhoñ ko aañsū tere hoñToñ ko hañsī dī hai

ḳhushbuoñ ko koī taqsīm kahāñ kar paayā
sarhadeñ toḌ bhī do giit sunātī hai havā

taqsīm ho rahī hai mirī vus.at-e-nazar
zarroñ ko mehr-o-māh kiye jā rahā huuñ maiñ

'zāhid' na.ī ġhazal hai ki taqsīm kā hisāb
bāñdhe haiñ tum ne ḳhuub qavāfī adaq adaq

hazār shukr na zaa.e huī mirī khetī
ki barq o sail meñ taqsīm daana daana huā

tere dharmoñ ne zātoñ kī taqsīm kī
tirī rasmoñ ne nafrat kī ta.alīm dī

taqsīm karne vaale ne aisā karam kiyā
añgushtarī kisī ko milī aur nagīñ mujhe

bahut aañsū rulā.e haiñ hameñ taqsīm-e-gulshan ne
muhājir vo samajhte haiñ to ye bāġhī batāte haiñ

hameñ taqsīm karne kā hunar un par nirālā hai
magar un ko harāne kā irāda ham ne paalā hai

taqsīm phir huī hai virāsat kuchh is tarah
ik maañ zamīñ pe dekhiye phir dar-ba-dar huī

vo āñkheñ ho ga.iiñ taqsīm do par
javāb ab aur mushkil ho gayā hai

ek duniyā mast ik aalam ḳharāb
kis ne kī taqsīm āñkhoñ se sharāb

mire paas us ko dene ke liye itnī mohabbat hai
ki maiñ ḳhud bhī nahīñ bachtī agar taqsīm kartī huuñ

havāoñ ke liye kuchh bhī bachā kar maiñ nahīñ rakhtī
ḳhizāñ-rut kī tarah puurā shajar taqsīm kartī huuñ

sivā lā-hāsilī ke aur hāsil kuchh nahīñ hotā
maiñ jab bhī ḳhud ko us par ai 'qamar' taqsīm kartī huuñ

nagar vāloñ meñ jab kotāh-dastī aam hotī hai
maiñ āñdhī kī tarah un meñ samar taqsīm kartī huuñ

maiñ pas-andāz kar saktī nahīñ yādoñ kī daulat ko
agar bach jaa.e to bār-e-digar taqsīm kartī huuñ

maiñ is dil se nikal kar bām-o-dar taqsīm kartī huuñ
ki ḳhud be-ghar huuñ aur logoñ meñ ghar taqsīm kartī huuñ

isī ḳhātir purāne lafz mere paas aate haiñ
ki maiñ un meñ mohabbat kā asar taqsīm kartī huuñ

ajab maañ huuñ ki ḳhud to un se aage jā nahīñ saktī
magar maiñ apne bachchoñ meñ safar taqsīm kartī huuñ