Tags-Parwana

lagātī hai gale se sham.a us ko maiñ samajhtā huuñ
fanā ho kar baqā ke rañg meñ parvāna aatā hai

is tarah bhī hotī hai tash.hīr-e-vafā aksar
phirtī hai sabā le kar ḳhākistar-e-parvāna

thī sham-e-farozāñ kī tarġhīb-e-jigar-sozī
yā aag meñ ḳhud apnī jal uTThā hai parvāna

āshiq na ho to husn kā ghar be-charāġh hai
lailā ko qais sham.a ko parvāna chāhiye

do zindagiyoñ kā hai chhoTā sā ye afsāna
lahrāyā jahāñ sho.ala andhā huā parvāna

ye aag mohabbat kī paanī se nahīñ bujhtī
phir sham.a se jā lipTā jaltā huā parvāna

dastān-e-sham.a thī yā qissa-e-parvāna thā
anjuman meñ ishq hī unvān har afsāna thā

yakjā hue haiñ bulbul o parvāna ai 'sirāj'
us sham.a-rū ke chīra-e-gulnār kī qasam

husn o ishq kī laag meñ aksar chheḌ udhar se hotī hai
sham.a kā sho.ala jab lahrāyā uḌ ke chalā parvāna bhī

ek lagī ke do haiñ asar aur donoñ hasb-e-marātib haiñ
lau jo lagā.e sham.a khaḌī hai raqs meñ hai parvāna bhī

avval-e-shab vo bazm kī raunaq sham.a bhī thī parvāna bhī
raat ke āḳhir hote hote ḳhatm thā ye afsāna bhī

us sham.a-rū pe dil se tasadduq hai balki 'ishq'
parvāna-vār jaan se har-dam nisār hai

candle par jab aan girā ik parvāna
maiñ ne cigarette raakh banā dī shahzādī

ek hālat par na dekhā us ko ham ne ek aan
gah gul o gah bulbul o gah sham.a o gah parvāna hai

gul kī aur bulbul kī sohbat ko chaman kā shāna hai
sarv hai juuñ sham.a tis par fāḳhta parvāna hai

parvāne kī tapish ne ḳhudā jaane kaan meñ
kyā kah diyā ki sham.a ke sar se dhuāñ uThā

'barqī' hai jis kā dīvāna ho ke fidā misl-e-parvāna
maar na Daale us kī chitvan māshā-allāh māshā-allāh

bāvajūd-e-yak-jahāñ hañgāma paidā.ī nahīñ
haiñ charāġhān-e-shabistān-e-dil-e-parvāna ham

shām-e-ġham meñ soz-e-ishq-e-ātish-e-ruḳhsār se
par-fashān-e-soḳhtan haiñ sūrat-e-parvāna ham

ik sham.a jalī to mahfil meñ har samt ujālā phail gayā
qānūn yahī hai fitrat kā parvāna jalā to kuchh bhī nahīñ