Tags-Parwana

nā-murādī ho jis pe parvāna
vo jalātā phire charāġh-e-murād

vo bazm meñ aa baiThe ab sham.a bujhā diije
marne ko vo aatā hai parvāne pe parvāna

raqs-e-parvāna kī gardish jo thame āḳhir-e-shab
ahl-e-mahfil ke liye ye bhī adā Thahregī

parvāna to jal chukā vale sham.a
sar apnā hanūz dhun rahī hai

koī to baat sham.a ke jalne meñ thī zarūr
jis par nisār hastī-e-parvāna ho ga.ī

jab ashk tirī yaad meñ āñkhoñ se Dhale haiñ
tāroñ ke diye sūrat-e-parvāna jale haiñ

ai sham.a bahā ashk chhupā rāz-e-mohabbat
ḳhākistar-e-parvāna hai betāb lagan meñ

dil-e-parvāna pe kyā guzregī
jab talak dhuup bujhe sham.a jale

parvāna vo kaheñge to ham un ko sho.ala-rū
ham bhī jalā.eñge jo vo ham ko jalā.eñge

sham.a-rū dil ye misl-e-parvāna
nāhaq apne ta.iiñ jalātā hai

kah rahī hai ye zamistāñ kī shab-e-chārdahum
koī parvāna jo is aag meñ jalnā chāhe

ye bhīnī bhīnī sī mast ḳhushbū ye halkī halkī sī dil-nashīñ bū
yahīñ kahīñ terī zulf ke paas koī parvāna jal rahā hai

āsāñ nahīñ hai aag meñ dānista kūdnā
dīvāna shauq-e-vasl meñ parvāna ho gayā

khol chashm-e-lutf de jāgīr maqsūd-e-'sirāj'
sham.a-rū parvāna-dil sayyād par baaqī rahā

jal gayā parvāna pan mujh sā samundar-ḳhū nahīñ
ye suḳhan shāgird kā ustād par baaqī rahā

dil jo qurbānī-e-parvāna kā hāmil na huā
darḳhur-e-anjuman-e-sham.a-shamā.il na huā

sūrat-e-parvāna huuñ maiñ bazm meñ
mujh ko tū ai sham-e-mahfil luuT le

kār-farmā hai faqat husn kā nairañg-e-kamāl
chāhe vo sham.a bane chāhe vo parvāna bane

muddat satī parvāna tuuñ hamdard mirā hai
us sham.a señ terī jo lagī aaj lagan bol