Tags-Aadmi

yahī shakl hai jise dekho ho yahī vaz.a hai jise ghūro ho
jise jaan kahte haiñ aadmī use dekhā ālam-e-ḳhvāb meñ

hameñ kaun pūchhe hai sāhibo na savāl meñ na javāb meñ
na to koī aadmī jaane hai na hisāb meñ na kitāb meñ

pukāre jā rahe ho ajnabī se chāhte kyā ho
ḳhud apne shor meñ gum aadmī se chāhte kyā ho

usī se ḳhatra-e-ifshā-e-rāz hai darpesh
vo aadmī jo hamāre hī darmiyāñ chup hai

kitne tafakkurāt se āzād ho gayā
vo aadmī jo iiñT pe sar rakh ke so gayā

daur-e-hāzir kī bazm meñ 'bekal'
kaun hai aadmī nahīñ mālūm

hujūm-e-shahr meñ har aadmī akelā hai
yahāñ kisī ko kisī kī vafā na raas aa.ī

ḳhudā jaane vo kaisā aadmī thā jis ke māthe par
koī bindiyā lagātā thā to ik jugnū chamaktā thā

kuchh un ghar se nahīñ kam hamārā ḳhāna-e-dil
jo aadmī kā guzar vaañ nahīñ to yaañ bhī nahīñ

us aadmī ko bas ik dhun savār rahtī hai
bahut hasīn hai duniyā ise ḳharāb karūñ

ye aadmī mire ḳhvāboñ kā saath kyā detā
haqīqatoñ se jo akasr farār māñge hai

nigāh barq nahīñ chehra āftāb nahīñ
vo aadmī hai magar dekhne kī taab nahīñ

ek an-miT raushnī thā arsh kī mehrāb par
aadmī ke ruup meñ aa kar maiñ faanī ho gayā

bahut se kaam haiñ duniyā meñ aadmī ke liye
kisī ke vāste kyuuñ zindagī harām kareñ

har aadmī ko yahāñ da.avā-e-ḳhudā.ī hai
akelī jaan hai kis kis kā ehtirām kareñ

qayāmat se bahut pahle qayāmat kyuuñ na ho barpā
jhukā hai aadmī ke sāmne sar ādamiyoñ kā

aaj bhī zamāne meñ aadmī karishma haiñ
sho.abde to milte haiñ mo.ajize nahīñ milte

aadmī ban ke bhaTakne meñ mazā aatā hai
maiñ ne sochā hī nahīñ thā ki farishta ho jā.ūñ

maiñ aadmī huuñ koī farishta nahīñ huzūr
maiñ aaj apnī zaat se ghabrā ke pī gayā

vo sūratan aadmī hai lekin mizāj se mār-e-āstīñ hai
agar use āstīñ meñ rakhnā to zahr pahle nikāl denā