Tags-Aadmi

jo aadmī hai talāsh-e-sakūñ meñ sadiyoñ se
usī ne kar dī yahāñ intihā bhī vahshat kī

aadmī ghir gayā masā.il meñ
rah ga.ī ziist be-sukūñ tanhā

mire hañsne pe vo kahte haiñ aisā bhī na ho be-ḳhud
ki koī aadmī se qahqaha dīvār ban jaa.e

vo aadmī bhī kisī roz apnī ḳhalvat meñ
mujhe na pā ke koī ā.īna nikālegā

zindagī gum na dostī gum hai
ye haqīqat hai aadmī gum hai

is taraf kyā turfa aalam hai ye khul saktā nahīñ
aadmī kā qad agar dīvār se ūñchā na ho

kahīñ phir dupaTTā sambhalne lagā
kahīñ aadmī ko bulāne lage

jo log sāda-dil the purkār ho ga.e haiñ
ab aadmī ke rishte dushvār ho ga.e haiñ

hazār baar aazmā chukā hai magar abhī aazmā rahā hai
abhī zamāne ko aadmī kā nahīñ hai kuchh e'tibār shāyad

haa.e is daur-e-aql-o-dānish ne
kar diyā aadmī ko saudā.ī

zindagī hai to badal letī hai karvaT 'shahpar'
aadmī huuñ kabhī haivān bhī ho jaatā huuñ

galī se terī jo Tuk ho ke aadmī nikle
to us ke saaya se jhaT ban ke ik parī nikle

tumhārī āñkhoñ kī gardishoñ meñ baḌī muravvat hai ham ne maanā
magar na itnī tasalliyāñ do ki dam nikal jaa.e aadmī kā

jab maiñ us aadmī se duur huā
ġham mirī zindagī se duur huā

merī rusvā.ī ke asbāb haiñ mere andar
aadmī huuñ so bahut ḳhvāb haiñ mere andar

chalo ki pūchheñ kisī soḳhta-jigar se ye baat
gurez hotā hai kab aadmī ko jiine se

yahī saath saath mire rahā maiñ isī kā pā na sakā patā
kabhī har qadam pe mujhe milā yahī aadmī yahī aadmī

ḳhvāhish ki thī aadmī ko lāzim
baḌh kar ilzām ho ga.ī hai

saroñ ke siiñg to jañgal kī den hote haiñ
vo aadmī to hai lekin Darā Darā sā hai

vo to raushan qumqumoñ ke shahr meñ mahsūr thā
saḳht hairat hai ki aisā aadmī kyuuñ kar bujhā