Tags-Aadmi

mujhe ḳhabar hai vo dariyā-mizāj aadmī hai
mujh aise dasht kā puurā na ḳharch ho jaa.e

pahle kī tarah aadmī miltā to hai lekin
aadhe kī tarah kā kabhī paune kī tarah kā

apnī hastī kā agar husn numāyāñ ho jaa.e
aadmī kasrat-e-anvār se hairāñ ho jaa.e

duniyā ajiib khel tamāshā lage mujhe
har aadmī hujūm meñ tanhā lage mujhe

qaid-e-hayāt o band-e-ġham asl meñ donoñ ek haiñ
maut se pahle aadmī ġham se najāt paa.e kyuuñ

kaun jaane uruuj kyā hogā
aadmī kā agar zavāl hai ye

sab se pur-amn vāqi.a ye hai
aadmī aadmī ko bhuul gayā

lamha lamha tujhe satā.eñge
aise zālim haiñ aadmī lamhe

maiñ bikhrā huā aadmī huuñ
mirī zehnī bīmāriyoñ kā sabab ye zamīñ hai

aadmī saath rahne pe majbūr hai phir bhī ik dūsre se bahut duur hai
dushmanoñ se to hotī bhalā sulh kyā jabki ḳhud dostoñ se bhī chaltī rahī

bazm-e-hastī meñ aane ko aa.e sabhī ahl-e-dil ahl-e-dīñ shā.ir-o-falsafī
aadmī ko jo karnā thā kartā rahā aur duniyā ba-dastūr chaltī rahī

tujhe mash.hūr honā ho to āshiq kī burā.ī kar
burā.ī se bahut jald aadmī mash.hūr hotā hai

koī majnūñ kī izzat ishq kī sarkār meñ dekhe
baḌī ḳhidmat pe aisā aadmī māmūr hotā hai

chale aayā karo merī taraf bhii!
mohabbat karne vaalā aadmī huuñ

agarche maiñ ik chaTān sā aadmī rahā huuñ
magar tire ba.ad hausla hai ki jī rahā huuñ

baḌī chiiz daulat-o-jāh hai baḌī vus.ateñ haiñ nasīb use
magar ahl-e-daulat-o-jāh meñ kahīñ aadmī kā guzar bhī hai

aur imroz kā ā.īna ye kahtā hai ki dekh
ādmī-zāde tirī umar kī shaam aa pahuñchī

dhuāñ-dhār taqrīr jis ne abhī kī thī vo aadmī hai
jo lafzoñ ke pul bāñdhtā hai

tārīf kar rahā hai abhī tak jo aadmī
uTThā to mere aib hazāroñ ginā.egā

ye aadmī hī binā-e-shar hai jo apnī hastī se be-ḳhabar hai
gunāh kā naam tak kahāñ thā vajūd-e-nau-e-bashar se pahle