Tags-Aadmi

hai ishq bad-maraz koī jaatā hai 'muntazir'
kyā ḳhaak is maraz kī davā aadmī kare

ummīd hai ki mujh ko ḳhudā aadmī kare
par aadmī kare to bhalā aadmī kare

guzrā maiñ aisī chaah se tā-chand ham-nashīñ
baiThā kisī ke sar ko lagā aadmī kare

gar kuchh kahā bigaḌ ke maiñ bas us ne hañs diyā
kyā aise aadmī kā gilā aadmī kare

maarā hai kohkan ne sar apne pe tesha aah
dil ko lagī ho choT to kyā aadmī kare

bhuul jaatā hai aadmī lekin
aap nazdīk lā ke bhuul ga.e

tumhārī bazm baat insāniyat kī phir raqīboñ meñ
bhare haiñ aadmī kī sūratoñ ke jānvar dekho

ehtimām-e-dār-o-zindāñ kī qasam
aadmī har ahd ne paidā kiye

balā se aap na aa.eñ pe aadmī un kā
tasallī aa ke mujhe vaqt-e-iztirāb to de

ye sochte hue bāzār se nikal aayā
na jaane aadmī kyuuñ ġhaar se nikal aayā

na.ī zindagī ke na.e makr o fan
na.e aadmī kī na.ī chāl-Dhāl

devtā banñe kī hasrat meñ muallaq ho ga.e
ab zarā nīche utariye aadmī ban jā.iye

chalte haiñ bach ke shaiḳh o barhaman ke saa.e se
apnā yahī amal hai bure aadmī ke saath

saaya hai kam khajūr ke ūñche daraḳht kā
ummīd bāñdhiye na baḌe aadmī ke saath

agar kahūñ maiñ vo aadmī hai
to kam-nigāhī ke zaḳhm khā.ūñ

ḳhudā-rasīda sahī laakh barguzīda sahī
jo aadmī ko na samjhe vo aadmī kyā hai

ba-qadr-e-paimāna-e-taḳhayyul surūr har dil meñ hai ḳhudī kā
agar na ho ye fareb-e-paiham to dam nikal jaa.e aadmī kā

aadmī Thokareñ na khaa.e agar
zindagī raah par nahīñ aatī

aadmī ko gumrāhī le ga.ī sitāroñ tak
rah ga.e bayābāñ meñ hazrat-e-ḳhizar tanhā

tum se kahā bhī thā 'majīd' ifshā na karnā rāz-e-ishq
rusvā hue galī galī ye kaise aadmī ho tum