Tags-Aadmi

vahāñ terā karam terā bharosa kaam aatā hai
jahāñ majbūr ho kar aadmī se kuchh nahīñ hotā

ḳhudā jab tak na chāhe aadmī se kuchh nahīñ hotā
mujhe ma.alūm hai merī ḳhushī se kuchh nahīñ hotā

maanā ki zindagī meñ hai zid kā bhī ek maqām
tum aadmī ho baat to sun lo ḳhudā nahīñ

yaañ jab āvezish hī Thahrī hai to zarre chhoḌ kar
aadmī ḳhurshīd se dast-o-garebāñ kyuuñ na ho

ik na ik rif.at ke aage sajda lāzim hai to phir
aadmī mahv-e-sujūd-e-sarv-e-ḳhūbāñ kyuuñ na ho

jab aadmī ke peT meñ aatī haiñ roTiyāñ
phūlī nahīñ badan meñ samātī haiñ roTiyāñ

aadmī ḳhud apne andar karbalā ban jā.egā
saare jazbe ḳhair ke nezoñ pe sar ho jā.eñge

faisla hijr kā manzūr bhī ho saktā hai
aadmī ishq meñ majbūr bhī ho saktā hai

thā jo kyā kuchh baat kahte kuchh na thā
aadmī kā bhī Thikānā kuchh nahīñ

aadmī kī ye kaisī ravish hai dil meñ is ke ye kaisī ḳhalish hai
ġhair se qurbat-e-dostāna aur apnoñ se be-e'tinā.ī

qabr meñ haq-goī bāhar manqabat qavvāliyāñ
aadmī kā aadmī honā tamāsha ho gayā

suno agar tum ḳhatm karnā hī chāhte ho
to aadmī ko aadmī se karne vaale aadmī ko ḳhatm kar do

maiñ to bas dekhtā rahtā huuñ zamīnoñ ke kaTāo
aadmī sochne vaalā ho to pāgal ho jaa.e

tāmīz-e-pisar-e-zamīn va ibn-e-falak na karnā
tum aadmī ho to aadmī kī hatak na karnā

pā gayā thā yaqīnan to sachchā.ī ko
ye tirā jurm hai gum-shuda aadmī

ahd-e-nau meñ yahī merī tārīf hai
maiñ ġharīb aadmī maiñ burā aadmī

chhoḌ jaatā hai aisā ḳhalā aadmī
bhar hī saktā nahīñ dūsrā aadmī

pattharoñ se lipaTte hue ro paḌā
aadmī kā satāyā huā aadmī

sochtā boltā ik nayā aadmī
ho gayā āḳhirash lāpata aadmī

ik taḌap ik lagan ik junūñ chāhiye
vo bhī kyā aadmī jo nirā aadmī