Tags-Akhbaar

khulegā un pe jo bainassutūr paḌhte haiñ
vo harf harf jo aḳhbār meñ nahīñ aatā

umr bhar paḌhte raheñge ik yahī aḳhbār-e-husn
aur saare sānehoñ se be-ḳhabar jā.eñge ham

adl-gāheñ to duur kī shai haiñ
qatl aḳhbār tak nahīñ pahuñchā

aaj aḳhbār meñ aa.ī hai ġhazal 'hāris' kī
aadmī ḳhuub hai kaisā hai suḳhnavar dekheñ

har kisī kī zabāñ pe hai charche mire
maano aḳhbār maiñ aaj kā ho gayā

bisāt-e-zāt pathrā.ī to jaanā
ḳhabar aḳhbār meñ aa.ī to jaanā

maiñ ne aḳhbār paḌh liyā 'āshiq'
koī taaza ḳhabar nahīñ baaqī

dukh ālam-e-insān ke the jo vo chhupā.e
ḳhat chāñd ko sar karne kā aḳhbār pe khīñchā

tere sapnoñ kī vo duniyā kyā huī us ko bhī dekh
ho chukī haiñ nam bahut āñkheñ uThā aḳhbār se

dīvār pe mazdūr kī tasvīr sajā kar
aḳhbār ke kone meñ ḳhabar ek lagā kar

ḳhaufnākī asar-andāz huā kartī hai
is ko aḳhbār kī mānind na ghar ghar phailā

hamāre Dūbne ke baad ubhreñge na.e taare
jabīn-e-dahr par chhaTkegī afshāñ ham nahīñ hoñge

surḳhiyāñ ḳhuun meñ Duubī haiñ sab aḳhbāroñ kī
aaj ke din koī aḳhbār na dekhā jaa.e

zalīl-o-ḳhvār hotī jā rahī hai
ġhazal aḳhbār hotī jā rahī hai

aḳhbār to jhūTe haiñ aksar ye ham ko kyā samjhā.eñge
kab kis ko uThānā behtar hai kab kis ko girānā lāzim hai

ḳhud-kushī kī ḳhabar aḳhbār kī surḳhī hogī
qatl mujh ko pas-e-dīvār kiyā jā.egā

kaaT kar aaj ke aḳhbār ko ta.avīz kiyā
terī tasvīr chhapī hai tirī tahrīr ke saath

sar chaḌh ke boltā hai har ik aadmī ke vo
qabze meñ jis ke aaj kā aḳhbār ho gayā

jin meñ ho mohabbat kā uḳhuvvat kā ishāra
paiġhām kuchh aise bhī to aḳhbār se nikleñ

vāqi.a shahr meñ kal to koī aisā na huā
ye to aḳhbār ke daftar kī ḳhabar lagtī hai