Tags-Alam

ilm se baḌhtī hai aql aur aql hai vo bad-dimāġh
jo bujhā detī hai siine meñ mohabbat kā charāġh

duur hī se aise ilm-e-jahl-parvar ko salām
husn-e-nisvāñ ko banā detā ho jo jāgīr-e-ām

chhoḌ detī takallum ko mulā.em qīl-o-qāl
ilm kā had se guzar jaanā hai tauhīn-e-jamāl

ik junūñ-parvar bagūlā hai vo ilm-e-be-vasūq
jis kī rau meñ kāñpne lagte haiñ shauhar ke huqūq

ilm hāsil kar faqat tadbīr-e-manzil ke liye
vo dimāġhoñ ke liye haiñ aur tū dil ke liye!

ilm uThā letā hai bazm-e-jāñ se sham-e-etaqād
ḳhāl-o-ḳhad kī maut hai chehre kī shān-e-ijtihād

ilm se rahtī hai pāband-e-shikan jis kī jabīñ
naaz se shānoñ par us kī zulf lahrātī nahīñ

mus.haf-e-rū-e-kitābī rū-kash-e-nāz-e-gulāb
aur ban jaa.e ye ne.amat daftar-e-ilm-e-hisāb

jab zarūrat se ziyāda naaz farmātā hai ilm
āriz-e-tābāñ ke bhole-pan ko khā jaatā hai ilm

dekh tujh par ilm kī bharpūr paḌ jaa.e na zarb
bhaag is parde meñ haiñ shaitān ke ālāt-e-harb

husn kā āġhosh-e-rañgīñ dil-fareb-o-dilrubā
ilm se ban jaa.e aqlīdas kā mahz ik dā.era!

ilm se har chand tujh ko kam kiyā hai bahra-mand
lekin is se ho na ai ma.asūm aurat dard-mand

ilm se baaqī nahīñ rahte mohabbat ke sifāt
aur mohabbat hai faqat le de ke terī kā.enāt

chāñdnī, qaus-e-quzah, aurat, shagūfa, lāla-zār
ilm kā in narm shānoñ par koī rakhtā hai baar?

jahāñ teġh-e-himmat alam dekhte haiñ
mahālāt kā sar qalam dekhte haiñ

ilm hunar aur fan to ab matrūk hue
khoTe sikke chalte haiñ bāzāroñ meñ

miyāñ se biibī haiñ parda hai un ko farz magar
miyāñ kā ilm hī uTThā to phir miyāñ kab tak

suufī hai vo be-ilm ho jo hastī se apnī
kis kaam paḌhā tū ne jo yuuñ ilm-e-tasavvuf

ġhul thā zahe husain kī shaukat zahe vaqār
goyā khaḌe haiñ jañg ko mahbūb-e-kirdgār

''ye shahr sūraj kā shahr hai is ke roz-o-shab kā pata nahīñ hai
na aaj tak vaqt aur tārīḳh kā mujhe ilm ho sakā hai