Tags-Pyas

maiñ jāntā huuñ magar mujhe us fareb meñ lutf aa rahā hai
sarāb hai vo jise mirī tishnagī ne dariyā banā diyā hai

jām-o-subū nahīñ tirī āñkhoñ se ab pilā
ai saaqī mar na jā.ūñ kahīñ tishnagī se maiñ

dasht ke ḳhema-e-dariyā meñ makīñ koī thā
tishnagī tere tamāshe meñ kahīñ koī thā

tishnagī meñ nazar aate haiñ sarāb-e-sahrā
har nazar par ye gumāñ hai koī maa.il to nahīñ

aa ga.ī dhuup mirī chhāñv ke pīchhe pīchhe
tishnagī jaise ho sahrāoñ ke pīchhe pīchhe

zabāñ pe rindān-e-kam-nazar kī shikāyat-e-sāqī-e-azal hai
talab sivā ho jo zarf dil se havas hai vo tishnagī nahīñ hai

shiddat hai pyaas meñ to sarovar ke jā qarīb
kab tishnagī miTī hai sarāboñ ke darmiyāñ

vahī lab-tishnagī apnī vahī tarġhīb-e-sarāb
dasht-e-ma.alūm kī ham āḳhirī had chhū aa.e

ḳhudā un ko shu.ūr-e-tishnagī detā to achchhā thā
inhīñ pyāsoñ meñ kyā shaġhl-e-subū karne se miltā hai

baḌh ga.ī kuchh aur pyāsī ketiyoñ kī tishnagī
abr chhāyā thā magar barsā nahīñ jī khol kar

jahāñ hai pyaas vahāñ sab gilās ḳhālī haiñ
jahāñ nadī hai vahāñ tishnagī bahut kam hai

lakīr khīñch ke baiThī hai tishnagī mirī
bas ek zid hai ki dariyā yahīñ pe aa.egā

ġhamoñ kī bhiiḌ ne kuchlā hai mujh ko shādmānī meñ
lagānā chāhtā thā tishnagī kī aag paanī meñ

bādaloñ ke beach thā maiñ be-sar-o-sāmāñ na thā
tishnagī kā zahr pī lenā koī āsāñ na thā

vafā ke tishnagī ke aur kuchh ma.asūm va.adoñ ke
ye saare qarz dekho ham lab-e-dariyā utaar aa.e

adīm-ul-fursatī shiddat se us kā yaad aa jaanā
ġhanīmat hai agar ye tishnagī mahsūs hotī hai

saaqī tirī navāzish-e-paiham ke bāvajūd
mahsūs ye huā ki abhī tishnagī rahī

junūñ kam justujū kam tishnagī kam
nazar aa.e na kyuuñ dariyā bhī shabnam

tishnagī sadiyoñ kī qurbat se na bujh paa.ī mirī
log kitne mutma.in thoḌī mulāqātoñ meñ haiñ

qismat meñ tishnagī se hī marnā likhā thā phir
kyuuñ sāhiloñ pe garm havā le ga.ī hameñ