Tags-Qabr

merā safar thā jism ke bāhar falak kī samt
utrā thā merī qabr pe jab āftāb ek

chain se haiñ faqīr ba.ad-e-fanā
qabr ke bhī sirhāne takiya hai

bahr-e-ġham meñ mareñge Duub ke ham
qabr ik din banegī Taapu meñ

hamārī manzil-e-maqsūd to hai qabr se aage
vahāñ tak bhī hameñ ye log pahuñchāne nahīñ jaate

ai 'fanā' shukr hai aaj bād-e-fanā us ne rakh lī mire pyaar ki aabrū
apne hāthoñ se us ne mirī qabr pe chādar-e-gul chaḌhā.ī mazā aa gayā

yahī qabr-e-zuleḳhā siiñ hai āvāz
agar hai yūsuf-e-sānī yahī hai

terī raftār kā maiñ kushta huuñ
qabr tak aa.iyo zarā hamrāh

kisī sub.h ḳhvāhish-e-marg se bhī numūd paatī hai zindagī
kisī shaam apne vajūd par bhī gumān hotā hai qabr kā

jab huā qabr meñ savāl ai 'mehr'
yā-alī kah ke maiñ mujīb huā

kis gul ne gul kiyā thā mirī sham-e-gor ko
thā qabr par hujūm-e-anādil tamām raat

tum aao dekhne vaalā nahīñ koī sar-e-madfan
charāġh-e-qabr afsurda thā kab kā bujh gayā hogā

añdhere ghar kī kuchh parvā nahīñ hai tīra-baḳhtoñ ko
tum aao qabr par raushan charāġh-e-naqsh-e-pā hogā

ham bekasoñ kī qabr sivā hargiz ai falak
nam-gīr ko na abr ke taan aur kī taraf

mujh qabr se yaar kyūñke jaave
hai sham-e-mazār kyūñke jaave

ḳhvāhish-e-sañg thī jo majnūñ ko
qabr par bhī hai meva-dār daraḳht

'qalaq' ġhazleñ paḌheñge jā-e-qur.āñ sab pas-e-murdan
hamārī qabr par jab majma-e-ahl-e-suḳhan hogā

phir na chaukeñge qayāmat tak 'nasīm'
paañv jis din qabr meñ phailā.eñge

qabr hai yā black-hole koī
jo gayā lauT kar nahīñ aayā

terī Thokar se na ulTe kahīñ vo taḳhta-e-qabr
le na ḳhvābīda koī fitna-e-mahshar karvaT

tū zamīñ par hai kahkashāñ jaisā
maiñ kisī qabr ke nishāñ jaisā