Tags-Raasta

juz be-ḳhudī guzar nahīñ kū-e-habīb meñ
gum ho gayā jo maiñ to milā rāsta mujhe

farishte aa.e agar lahad meñ to saaf kah dūñgā rāsta lo
jab us kī chāhat meñ jaan de dī to baat kahne ko kyā rahī hai

vahī oḌhī huī hai dhuul ab tak
vahī pairoñ se lipTā rāsta hai

kahīñ sāñseñ chaḌhā detā hai merī
kahīñ āhista chaltā rāsta hai

zamāne ho ga.e haiñ chalte chalte
kahāñ jaatā ye dil kā rāsta hai

sabhī kī apnī apnī manzileñ 'shāz'
sabhī kā apnā apnā rāsta hai

kabhī uktā gayā maiñ ḳhud hī ḳhud se
kabhī apnā hī dekhā rāsta hai

mohabbat hausla hai apnā apnā
kahīñ manzil kisī kā rāsta hai

havā hai dhund hai aur tez bārish
pahāḌī hai zarā sā rāsta hai

ye kaise moḌ par maiñ aa gayā huuñ
ki chaltā huuñ to chaltā rāsta hai

mohabbat ek aisā rāsta hai
chalo jitnā ye itnā rāsta hai

dam-e-āḳhir ilāj-e-soz-e-ġham kahne kī bāteñ haiñ
mirā rasta na rokeñ rāsta leñ chāra-gar apnā

yahāñ se to ab rāsta hī nahīñ
to kyā koī aage gayā hī nahīñ

vo koī raah kā patthar ho yā hasīñ manzar
jahāñ bhī rāsta Thahrā vahīñ mazār milā

mujhe charāġh kī hairat bhī ho chukī ma.alūm
ab is se aage koī rāsta batā mujh ko

gumāñ huā ki rāsta abhī mirī nazar meñ hai
sharīr shutr-nafs be-mahār kar liyā gayā

safar kā aur koī silsila nikāleñge
bhaTak ga.e to nayā rāsta nikāleñge

vo jis meñ hadd-e-nazar tak charāġh jalte the
vo rāsta hī faqat darmiyān tak pahuñchā

nikal paḌe ho use DhūñDne magar 'hashamī'
ye rāsta hai mirī jaan nā-rasā.ī kā

hamārī dasht-navardī ko gumrahī na samajh
bhaTakne vaale nayā rāsta banāte haiñ