Tags-Raasta

ishq vo chaar sū safar hai jahāñ
koī bhī rāsta nahīñ ruktā

ab to mahsūs ye hotā hai ki manzil hai qarīb
rāsta aisā nahīñ hotā munavvar sā.īñ

paañv us ke bhī nahīñ uThte mire ghar kī taraf
aur ab ke rāsta badlā huā merā bhī hai

safar-e-shauq kā hāsil ma.alūm
rāsta paañv kī zanjīr huā

rāsta aap banānā hī koī sahl nahīñ
phir usī rāste kā aap musāfir honā

ek haibatnāk manzar dil ko dahlātā huā
rāsta apnā achānak phir se badlī thī nadī

rāsta de ai hujūm-e-shahr ghar jā.eñge ham
aur tere darmiyāñ Thahre to mar jā.eñge ham

nafratoñ ne har taraf se gher rakkhā hai hameñ
jab ye dīvāreñ gireñgī rāsta ho jā.egā

bad-dimāġhī mirī hai vahī jo ki thī tarz-e-ḳhud-bīñ tumhārā vo hai jo ki thā
chal rahe haiñ anā ke sahāre magar rāsta hī nahīñ vāpsī ke liye

guzrā na tire ba.ad koī kūcha-e-dil se
ye rāsta ik naqsh-e-kaf-e-pā ke liye thā

safar gumāñ hai rāsta ḳhayāl hai
chaloge mere saath kyā ḳhayāl hai

aap gumrāh hai 'shaukat' mirī vahshat lekin
rāsta bhūlne vāloñ ko batā aatī hai

log phir rañg koī aur use deñ shāyad
is liye rāsta sunsān liyā hai maiñ ne

majlis-e-ālām se kis tarah nikle zindagī
ye vo zindāñ hai ki jis kā rāsta koī nahīñ

naddī ye jaise mauj meñ dariyā se jā mile
tum se kahīñ milūñ maiñ agar rāsta mile

merī nashist pe bhī kal aa.egā koī dūsrā
tum bhī banā ke rāsta mere liye jagah karo

tire karam kā sazā-vār maiñ rahā jab tak
ġham-e-hayāt ne bhī rāsta diyā hai mujhe

kar ke saudā jo paañv kā baiThā
de gayā koī rāsta mujh ko

rāsta rok liyā merā kisī bachche ne
is meñ koī to 'asar' merī bhalā.ī hogī

ḳhāmushī zor-e-bayāñ hotī hai
rāsta dījiye goyā.ī ko