Tags-Raasta

niil meñ rāsta banñā to hai dushvār magar
merī ġhairat mire hāthoñ meñ asā detī hai

falak pe bhiiḌ lagī thī shikasta aahoñ kī
duā se pahle mujhe rāsta banānā paḌā

niklā thā ḳhud ko DhūñDne us regzār meñ
māyūs ho ke rāsta vāpas chalā gayā

na mazā gumrahī meñ miltā hai
na sambhalne kā rāsta hai koī

kho gayā jo ghane añdheroñ meñ
us ujāle kā rāsta huuñ maiñ

ābād hai ḳhazāne kī afvāh se vajūd
matrūk jañgaloñ kā koī rāsta huuñ maiñ

kahīñ se yak-laḳht zindagī merī kaaT degā
jo rāsta iḳhtiyār maiñ ne nahīñ kiyā thā

nā-āshnā-e-naqsh-e-kaf-e-pā-e-ām hai
vo rāsta bhī rāhguzar kah diyā gayā

kaam jo rahnumā kā thā maiñ ne kiyā us kī manzil kā us ko pata bhī diyā
phir bhī 'turfa' koī rahrav-e-kam-nazar rāsta bhuul jaa.e to maiñ kyā karūñ

rāsta ye tirī chāhat kā nikālā ham ne
bas tire chāhne vāloñ pe nazar rakhte haiñ

ham us ke dil tak pahuñchte kaise
badan ko rāsta samajh liyā thā

har rañg-e-tarab mausam o manzar se nikālā
ik rāsta phir sa.ī-e-mukarrar se nikālā

vādi-e-ġham ke ham khañDar hī sahī
aane vāloñ kā rāsta to hue

tū to paañv meñ liye phirtā hai manzil lekin
ham ko bas ek tirā rāsta taknā aayā

ḳhud se betāb huuñ nikalne ko
koī batlā.e rāsta kyā hai

ham tirā rāsta takte hoñge
aur tū sāmne baiThā hogā

manzileñ rāsta ban jaatī haiñ
DhūñDne vāloñ ne dekhā hogā

utar ke shāḳh se ik ek zard patte ne
na.ī rutoñ ke liye rāsta banāyā thā

maiñ apne-āp se barham thā vo ḳhafā mujh se
sukūñ se kaise guzartā ye rāsta mujh se

kajlā gayā hai kitne hī qadmoñ tale magar
ye rāsta ajiib hai kuchh boltā nahīñ