Tags-Raasta

mar ke ḳhud meñ dafn ho jā.ūñgī maiñ bhī ek din
sab mujhe DhūñDeñge jab maiñ rāsta ho jā.ūñgī

shahr terā tujhe mubārak ho
mujh ko jañgal kā rāsta achchhā

tum agar DhūñDte tah-e-dil tak
rāsta inqalāb kā bhī thā

saḌak ko chhoḌ kar chalnā paḌegā
ki mere ghar kā kachchā rāsta hai

maiñ jazb o bast kī manzil meñ qaid huuñ kab se
mire ḳhudā tū farārī kā rāsta kar de

rāsta ḳhvāb ke andar se nikaltā huā thā
koī kyā ḳhvāb ke andar se nikaltā huā thā

zaḳhm taaza kar rahā huuñ chāragar ko dekh kar
rāsta maiñ ne badal Daalā ḳhizar ko dekh kar

diloñ ke beach meñ dīvār tānne vaalo
khulī havā meñ nikalne kā rāsta rakhnā

maiñ zīna-e-ḳhvāb se utar kar sahar talak aa to jā.ūñ lekin
ye shaam mujh par ayaañ na hogī ye shab mujhe rāsta na degī

ai samundar rāsta denā mujhe
lauh-e-jāñ pe naam likkhā aur hai

udāsī pat-jhaḌoñ kī shaam oḌhe rāsta taktī
pahāḌī par hazāroñ saal kī koī imārat sī

bichhaḌ ke mujh se abas manziloñ kī chāhat hai
jidhar bhī jāoge har-samt rāsta maiñ huuñ

bahut hī ḳhūbsūrat rāsta hai
jo sīdhā jā rahā hai rā.egāñ tak

dil-o-nazar meñ hī apne ḳheme lagā liye haiñ
hameñ ḳhabar hai ki rāsta hai ḳharāb aage

miTā rahā huuñ ḳhirad kī tamām tashbīheñ
junūñ kā rāsta āsān karne vaalā huuñ

milī na manzil-e-maqsūd is liye bhī mujhe
maiñ har qadam pe nayā rāsta badaltā rahā

manzil-e-sidq-o-safā kā rāsta apnā.iye
kārvān-e-zindagī ke rahnumā ban jā.iye

bhaTak na jaa.e kahīñ dhaḌkanoñ ke jañgal meñ
dimāġh DhūñDne niklā hai rāsta dil kā

kaun suntā thā kisī kī koī kyā kahtā vahāñ
mere kāñdhe pe safar thā maiñ ne pakḌā rāsta

tairtī phirtī haiñ chāroñ samt rañgīñ titliyāñ
TeḌhā TeḌhā ūñchā nīchā giilā kachchā rāsta