Tags-Raasta

bichhḌe hue ḳhvāb aa ke pakaḌ lete haiñ dāman
har rāsta parchhā.iyoñ ne rok liyā hai

kahīñ se chāñd kahīñ se qutub-numā niklā
qadam jo ghar se nikālā to rāsta niklā

tum apne sāmne kī bhiiḌ se ho kar guzar jaao
ki aage vaale to hargiz na tum ko rāsta deñge

is hujūm-e-kas-o-nā-kas ko bhī jaanā hai kahīñ
rāsta dījiye is ko bhī guzarne ke liye

moḌ haiñ har har qadam par kis se pūchheñ rāsta
phir rahā huuñ shahr meñ jaise koī dīvāna ho

ai jazb-e-shauq-e-manzil mamnūn-e-ġhair kyuuñ hoñ
ḳhud rāsta badal kar bichhḌā huuñ kārvāñ se

irādoñ meñ zarā bijlī jagā ke dekh ai 'panchhī'
isī pinjre se niklegā chaman kā rāsta koī

rāsta DhūñDo ki manzil zaat meñ mahsūr hai
band darvāzoñ ke bāhar hai kiran tanvīr kī

manziloñ kī bāteñ to ḳhvāb jaisī bāteñ haiñ
umr biit jaatī hai rāsta banāne meñ

jis taraf jaa.eñ jahāñ jaa.eñ bharī duniyā meñ
rāsta roke tirī yaad khaḌī hotī hai

maiñ koī manzil nahīñ thā miil kā patthar thā bas
ba.ad mere bhī musalsal rāsta chaltā rahā

khīñch ke lā.egā manzil ko mire qadmoñ tak
rāsta roke hai jo halqa-e-zanjīr mirā

us se aage jāoge tab jāneñge
manzil tak to rāsta tum ko laayā hai

khetoñ meñ ik rāsta ho
aur raste pe

mire chārāgar maiñ huuñ dar-ba-dar maiñ to thak ga.ī hai ajab safar
mirī be-nishāñ sī haiñ manzileñ mujhe rāsta bhī dikhā piyā

nikal chalo hai abhī sahl rāsta yaaro
ki mehrbāñ hai to ye mehrbāñ bhī kitnī der

har ek zehan meñ apne hī band hai 'mājid'
fazā ke ḳhol se bāhar hai rāsta koī

rāsta bhī ġhalat ho saktā hai manzil bhī ġhalat
har sitārā to sitārā bhī nahīñ ho saktā

safar kī ye kaisī vus.ateñ haiñ ki rāsta hai na koī manzil
thakan kā ehsās bhī na utre qadam qadam rahguzār māñge

rāsta gar nahīñ to phir 'mohsin'
mujh ko be-rāsta hī jaane de