Tags-Raasta

bahut rokā hai is ko pattharoñ ne
magar paanī ko rāsta mil gayā hai

maiñ jā baiThūñ kisī bargad ke nīche
sukūñ kā bas yahī ek rāsta hai

saath terā na kuchh badal paayā
merā hī rāsta akelā thā

hai adam kā saḳht vo marhala jahāñ apnā apnā hai rāsta
vo safar nahīñ ye jo saath ham kisī ham-safar ke chale ga.e

rāsta chāhiye dariyā kī farāvānī ko
hai agar zo.am to le rok le tuġhyānī ko

musāfir sab palaT kar aa rahe haiñ
vahāñ se band hai har rāsta kyā

ye ajab rāsta hai jis pe lagāyā hai mujhe
mahv-e-hairat huuñ ki kyā chiiz banāyā hai mujhe

maiñ lahza lahza kaT ke gir rahā huuñ andhī khaa.ī meñ
ye zindagī kā rāsta nahīñ hai pul-sirāt hai

ye jism-o-jāñ kā qāfila hai rāsta pe kaun se
na manziloñ kī aas hai na rahravoñ kā saath hai

ye rāsta to usī dar pe jā ke ruktā thā
ki vo ḳhafā hai to ye rāsta muḌā hī na ho

na jā ki is se pare dasht-e-marg ho shāyad
palaTnā chāheñ vahāñ se to rāsta hī na ho

ye kis hisār meñ sāñsoñ ne kas diyā hai mujhe
ye kaisā ghar hai nikalne kā rāsta bhī nahīñ

ye miTTī paañv mire chhoḌtī nahīñ varna
falak kā rāsta bhī sāmne paḌā huā hai

shab-e-tārīk mirā rāsta kyā rokegī
mire āñchal meñ sitāre haiñ sahar dāman meñ

kahā hai ek nujūmī ne tum miloge hameñ
zamīñ se chāñd talak ek rāsta hogā

nikal aa.e kidhar manzil kī dhun meñ
yahāñ to rāsta hī rāsta hai

amn kī sab shāhrāheñ tañg ho kar rah ga.iiñ
hādsoñ ne rāsta kitnā kushāda kar liyā

talāshte haiñ abhī ham-safar bhī kho.e hue
ki manziloñ se udhar rāsta banānā hai

safar kā ek nayā silsila banānā hai
ab āsmān talak rāsta banānā hai

hote hote maiñ pahuñch jaatā huuñ apne aap tak
is se aage aur koī rāsta jaatā nahīñ