Tags-Raasta

khīñch kar le jā.egā anjān mahvar kī taraf
hai badan kā rāsta bāhar se andar kī taraf

hamīñ talāsh ke dete haiñ rāsta sab ko
hamīñ ko ba.ad meñ rāsta dikhāyā jaatā hai

bas ye huā ki rāsta chup-chāp kaT gayā
itnī sī vārdāt kī tash.hīr kyā kareñ

ab bhī us kī galī meñ muḌtā hai
dil se ik rāsta purānā sā

kyuuñ rāsta chhoḌ ke chalte ho kyuuñ logoñ se katrāte ho
kyuuñ chalte phirte apne liye tum aap hī ik dīvār hue

mujhī se māñge hai sailāb rāsta 'saulat'
ye jāntā hai ki miTTī ke ghar meñ rahtā huuñ

kise ḳhabar thī ki us dasht se guzarnā hai
jahāñ se lauT ke aane kā rāsta bhī nahīñ

har taraf phailā huā thā be-yaqīnī kā dhuāñ
ḳhud-baḳhud 'fārūq' phir ik rāsta bantā gayā

zindagī aur maut kā yuuñ rābta rah jā.egā
maqtaloñ ko jaane vaalā rāsta rah jā.egā

kyuuñ rāsta dekhā kiyā us kā maiñ sar-e-shām
be-dard kā mujh se koī paimāñ to nahīñ thā

rāsta der tak sochtā rah gayā
jaane vaale kā kyuuñ naqsh-e-pā rah gayā

mahfūz rah gayā na koī rāsta na moḌ
jaayā karo na ghar se nikal kar yahāñ vahāñ

jo nasheb aa.egā rāsta dikhā.egā
moḌ ḳhud batā.egā aadmī kahāñ jaa.e

hameñ nasīb huā aisī manziloñ kā safar
qadam qadam pe jahāñ rāsta badaltā hai

zindagī bhar Thokareñ khāne se behtar hai 'zafar'
rāsta chalte hue raste ke patthar dekhnā

tujhe ai ham-safar kaise sambhālūñ
pahāḌī rāsta hai aur maiñ huuñ

utar ke shāḳh se ik ek zard patte ne
na.ī rutoñ ke liye rāsta banāyā thā

kise nasīb huī us ke jism kī ḳhushbū
vo mere saath rahā rāsta badalne tak

raah un kī bahut kushāda hai
jo kabhī rāsta nahīñ dete

rāsta sunsān thā to muḌ ke dekhā kyuuñ nahīñ
mujh ko tanhā dekh kar us ne pukārā kyuuñ nahīñ