Tags-Raasta

dil-e-shikasta ke hausloñ ne har ek manzil ko sar kiyā hai
tumhāre dar tak bhī aan pahuñche par is se aage bhī rāsta hai

ab us kā rañj bhī kyā kyuuñ lahūluhān haiñ paañv
chale the jis pe 'zafar' rāsta hī aisā thā

mujhe is kī ḳhabar tak bhī na hone paa.e aur ik din
safar ke darmiyāñ yuuñ rāsta tabdīl ho jaa.e

mujh se nahīñ use mire fardā se hai umiid
manzil se koī aur faqat rāsta huuñ maiñ

miyān-e-rāh kaḌī dhuup meñ na chhoḌ mujhe
batā to de ki kahīñ ghar kā rāsta bhī hai

har ek gaam pe jo laḌkhaḌā.e rahte haiñ
ġhubār-e-rāh meñ vo rāsta nahīñ hote

āb-e-ravāñ huuñ rāsta kyuuñ na DhūñDh luuñ
maiñ tere intizār meñ kab tak rukā rahūñ

ajiib bhūl-bhulayyāñ hai rāsta dil kā
yahāñ to ḳhizr bhī hotā to Dagmagā jaatā

kahīñ tum apnī qismat kā likhā tabdīl kar lete
to shāyad ham bhī apnā rāsta tabdīl kar lete

kyā kisī baat kī sazā hai mujhe
rāsta phir bulā rahā hai mujhe

ye kaun rāsta roke hue khaḌā thā abhī
aur ab ye raah ke patthar haTāne vaalā kaun

mirī uljhan sulajhtī jā rahī hai
dikhāyā hai tumhī ne rāsta to

azāb-e-vahshat-e-jāñ kā sila na māñge koī
na.e safar ke liye rāsta na māñge koī

aisā hamvār rāsta kab thā
kyā zarūrat thī utnī ujlat kī

ḳhulūs hai ye to us kā kahāñ kī majbūrī
rihā.ī kā hai samundar ko rāsta dariyā

haif tujh ko zindagī kā rāsta miltā nahīñ
piir milte haiñ tujhe lekin ḳhudā miltā nahīñ

zindagī kā rāsta is tarah mil saktā nahīñ
ġhuncha-e-ummīd in pīroñ se khil saktā nahīñ

har galī kī moḌ par ik piir hai baiThā huā
pūchhtā hai jis se har ik zindagī kā rāsta

apnī manzil kā rāsta bhejo
jaan ham ko vahāñ bulā bhejo

jahāñ tak paañv mere jā sake haiñ
vahīñ tak rāsta Thahrā huā hai