Tags-Raasta

na sāthī hai na manzil kā pata hai
mohabbat rāsta hī rāsta hai

'munīr' jab bhī chale koī rāsta na milā
vajūd-e-rāhguzar e.atibār kis kā thā

koī manzil to rāsta hī nahīñ
un se ab koī silsila hī nahīñ

ātish zer-e-pā Thaharne na de
ab to manzil bhī rāsta hai mujhe

kashtiyāñ saarī jalā Dālīñ anā kī jañg meñ
maiñ ne bhī kab vāpsī kā rāsta rahne diyā

us se aage jāoge tab jāneñge
manzil tak to rāsta tum ko laayā hai

jahāñ pahuñch ke qadam Dagmagā.e haiñ sab ke
usī maqām se ab apnā rāsta hogā

kaThin thā rāsta dushvār thī har ik manzil
koī dikhā.e usī raah se guzar ke mujhe

ishq baḌhtā rahā sū-e-dār-o-rasan zaḳhm khātā huā muskurātā huā
rāsta rokte rokte thak ga.e zindagī ke badalte hue zāviye

ham qāfile se bichhḌe hue haiñ magar 'nabīl'
ik rāsta alag se nikāle hue to haiñ

rāsta nahīñ chalte sirf ḳhaak uḌāte haiñ
kārvāñ se bhī aage gard-e-kārvāñ kyuuñ hai

bastiyo ab to rāsta de do
ab to maiñ us galī ko bhuul gayā

dar-ba-dar kī ḳhaak peshānī pe mal kar aa.egā
ghūm-phir kar rāsta phir mere hī ghar aa.egā

log manzil pe the ham se pahle
thā koī rāsta shāyad āsān

jī meñ hai ik din jhuum kar us shoḳh ko sajda karūñ
sajde se phir allāh tak ik rāsta paidā karūñ

yahāñ se rāsta koī kisī jānib nahīñ jaatā
yahīñ se ik safar kī ibtidā hone hī vaalī hai

moḌ par pahuñche to dekhoge ki har manzil hai sahl
bas yahī ik rāsta hai jo pareshānī kā hai

añdherī raat meñ ye kis kā naqsh-e-pā chamkā
musāfiroñ kī nigāhoñ meñ rāsta chamkā

jahāñ jaate haiñ ham us kī galī se ho ke jaate haiñ
agarche rāsta is rāste se duur hotā hai

ham se baḌhī masāfat-e-dasht-e-vafā ki ham
ḳhud hī bhaTak ga.e jo kabhī rāsta milā