Tags-Raat

hai merī jaan mirī jaañ tire tabassum meñ
tū muskurā mire saaqī ki raat jaatī hai

shab-e-visāl kī ḳhushbū fazā kī rañgīnī
kahīñ se lā mire saaqī ki raat jaatī hai

kisī bahār kā naġhma koī suhānī ġhazal
tū gungunā mire saaqī ki raat jaatī hai

phir ik fareb meñ ye shab guzar na jaa.e kahīñ
qasam na khā mire saaqī ki raat jaatī hai

qarīb ho ke bhī 'āzim' ke tū qarīb nahīñ
palaT ke aa mire saaqī ki raat jaatī hai

maiñ din-rāt tujh ko karūñ yaad kitnā
mohabbat tirī ab sazā de rahī hai

kyā ho.egā sunoge agar kaan dhar ke tum
guzrī birah kī raat jo mujh par kahāniyāñ

raat kī tārīkiyāñ pahchān letī thiiñ use
ruuh kī āvāz thā vo jism kā saaya na thā

raat aa.ī to charāġhoñ kī baḌī ta.azīm thī
aur jab guzrī to koī pūchhne vaalā na thā

bhāgtā huuñ raat jis jañgal se duur
sub.h usī ko sāmne paatā huuñ maiñ

jī jo chāhe hai ki mar jā.ūñ maiñ
raat se pahle sahar ho kyūñkar

khoveñ haiñ niiñd merī musībat bayāniyāñ
tum bhī to ek raat suno ye kahāniyāñ

ai shaiḳh-o-barahman dekhtā huuñ din raat tumhāre murdoñ ko
ye ḳhaak meñ milte rahte haiñ vo aag meñ jalte rahte haiñ

ārām-o-musībat kyā shai hai hotā nahīñ kuchh ehsās unheñ
manzil kī jo dhun meñ haiñ 'sābir' din-rāt vo chalte rahte haiñ

kabhī yuuñ bhī aa mirī aañkh meñ ki mirī nazar ko ḳhabar na ho
mujhe ek raat navāz de magar is ke baad sahar na ho

merī tarah 'nadīm' use hichkiyāñ na aa.eñ
jo sochtā hai raat kai pichhle pahar mujhe

maanā hijr kī raat hai ye par kitnī ḳhushī kī baat hai ye
ġham kī rim-rim-jhim kī hamdam bazm-e-tarab kā hissa hai

mohabbat se tirī yādeñ jagā kar so rahā huuñ
maiñ aadhī raat ko ḳhushbū lagā kar so rahā huuñ

sunā hai jab se tū ne raat āñkhoñ meñ basar kī
maiñ bistar kī jagah kāñTe bichhā kar so rahā huuñ

apne kāñdhoñ par liye apnī ka.ī shaḳhsiyyateñ
raat bhar āñkhoñ ke jañgal meñ bhaTakte hī rahe