Tags-Raat

maiñ jis ke saath ka.ī din guzār aayā huuñ
vo mere saath basar raat kyuuñ nahīñ kartā

is raushnī meñ chehra chhupāoge kab talak
tum māñgte ho raat magar raat kaise ho

raat baaqī hai abhī kis liye ghabrā ke uThe
top chhuTne do mirī jaan azaañ hone do

shahr kī galiyāñ ghuum rahī haiñ mere qadam ke saath
aise safar meñ itnī thakan meñ kaise kaTegī raat

raat banā detī thī ik pal yādoñ kā
maazī tak yuuñ merā aanā jaanā thā

ik māhtāb thā ki pighaltā chalā gayā
ik sham.a thī ki saath mire raat bhar jalī

aadhī raat aa ga.ī bas bas dil-e-betāb sambhal
ham samajhte haiñ jo is karb kā hāsil hogā

raat kā ḳhvāb nahīñ jis kī har ik de ta.abīr
ye vo armān hai puurā jo ba-mushkil hogā

ab bhī raushan hai tire dil meñ mohabbat kā diyā
raat phir sham-e-yaqīñ-sāz jalāne meñ kaTī

ga.ī aadhī raat guzar magar na to aa.e ḳhud na lī kuchh ḳhabar
maiñ taḌap rahā huuñ idhar udhar yūñhī intizār meñ shaam se

aisī duniyā meñ kab tak guzārā kareñ tum hī kah do ki kaise gavārā kareñ
raat mujh se mirī bebasī ne kahā bebasī ke liye ek taaza ġhazal

apnī tanhā.ī meñ raat maiñ thā magan ek aahaT huī dhyān meñ daf.atan
mujh se bāteñ karo ḳhāmushī ne kahā ḳhāmushī ke liye ek taaza ġhazal

vo raat kisī taur jo kaaTe nahīñ kaTtī
vo raat bhī karte haiñ kisī taur basar ham

raat ghanā jañgal aur maiñ
ek chanā kyā phoḌe bhaaḌ

ik harf mere kaan meñ kahtā hai rāt-din
mujh ko kitāb-e-ḳhāk se bāhar nikāliye

numūd un kī bhī daur-e-subū meñ thī kal raat
abhī jo daur-e-tah-e-āsmāñ nahīñ guzre

kal raat ik ajiib pahelī huī havā
jalte hue diyoñ kī sahelī huī havā

base haiñ shauq suuñ jā kar guloñ meñ raat kuuñ shāyad
ki aatī hai gul-andāmāñ ke baasī baas hāroñ meñ

saal mahīne din aur raat
jhoñke chaar havā ke the

ishq-o-talab kī raah meñ bād-e-havas bhī tez thī
maiñ ne jalāyā rāt-bhar kar ke ḳhudā ḳhudā charāġh