Tags-Raat

kāTnā raat kā āsān bhī ho saktā hai
dil meñ ik yaad kī qindīl bhī ho saktī hai

raat parde se zarā muñh jo kisū kā niklā
sho.ala samjhā thā use maiñ pa bhabhūkā niklā

raat kī raat Thaharne vaale vaqt-e-ḳhush kī baat samajh
sub.h to ik darvāza-e-ġham par duniyā āñkheñ maltī hai

be-kār kabhū raat ko bhī maiñ nahīñ rahtā
juuñ sham.a mujhe tā-ba-sahar mashq-e-fanā hai

āñkheñ nīchī kar lo raat ke raste nā-hamvār bhī haiñ
chāñd ko takte chalne vaalo dekho Thokar khāoge

kal raat bah rahā thā jo bārish ke naam se
merā hī ek ashk-e-tar saarī ghaTā meñ thā

chehra un kā sub.h-e-raushan gesū jaise kaalī raat
bāteñ un kī sub.hān-allāh goyā qur.āñ kī āyāt

siyāh paḌne lagegī sham-e-visāl kī zau
khilā huā rāt-bhar jo rañg-e-hinā rahegā

bujhtī āñkhoñ meñ tire ḳhvāb kā bosa rakkhā
raat phir ham ne añdheroñ meñ ujālā rakkhā

sham.a phīkī raat kam mahfil udaas
ab muġhannī kā tarāna aur hai

kohar meñ gum-sum samā.ato tum gavāh rahnā
maiñ ek dīvār-e-girya har raat chun rahā huuñ

haal hai na maazī hai vaqt kā tasalsul hai
raat kā añdherā kyā sub.h kā ujālā kyā

ḳhatm ho raat kā tavīl safar
ziina ziina utar ke dekheñge

kuchh itne zor kā aayā thā zalzala kal raat
agar maiñ jaag na jaatā to ḳhvāb mar jaatā

kuchh ab sambhalne lagī hai jaañ bhī badal chalā daur-e-āsmāñ bhī
jo raat bhārī thī Tal ga.ī hai jo din kaḌā thā guzar gayā vo

mirā tū ḳhuuñ ho gayā hai paanī sitamgaroñ kī palak na bhīgī
jo naala uTThā thā raat dil se na jaane kyuuñ be-asar gayā vo

vo mai-kade ko jagāne vaalā vo raat kī niiñd uḌāne vaalā
ye aaj kyā us ke jī meñ aa.ī ki shaam hote hī ghar gayā vo

vo hijr kī raat kā sitāra vo ham-nafas ham-suḳhan hamārā
sadā rahe us kā naam pyārā sunā hai kal raat mar gayā vo

vo raat kā be-navā musāfir vo terā shā.ir vo terā 'nāsir'
tirī galī tak to ham ne dekhā thā phir na jaane kidhar gayā vo

palkoñ meñ sulagte tāroñ se maiñ raat kī afshāñ chun na sakā
sho.aloñ ko chhupā.e phirtā huuñ maiñ dil ke ek nagīne meñ