Tags-Raat

gayā din huī shaam aa.ī hai raat
ḳhudā ne ajab shai banā.ī hai raat

dasht meñ raat banāte hue Dartā huuñ maiñ
apnī āvāz bujhāte hue Dartā huuñ maiñ

sub.h tak hogā mire ghar pe hujūm-e-ḳhilqat
raat kī raat faqat ālam-e-tanhā.ī hai

aaj sochā hai jāgūñgā maiñ raat meñ
kachche phal sā mujhe toḌtā kaun hai

kyā tamāshā hai jo kal raat vo laa.e tashrīf
be-ḳhudī ne ye liyā aan ke yakbār ki bas

dhaḌkanoñ meñ hai basāyā tū ne jis ko raat din
jaane kis din tujh ko vo dilbar jafā de jā.egā

sub.h-saverā daftar biivī bachche mahfil nīndeñ raat
yaar kisī ko mushkil bhī hotī hai is āsānī par

raat kitnī raushan hai kuchh likhā-paḌhī kar leñ aao phir ġhazal kah leñ
chāñdnī ke manzar meñ do ghaḌī zarā dahkeñ aao phir ġhazal kah leñ

raat kal fazāoñ meñ terī hī kahānī thī
ham bhī sunñe vaale the dil kī pāsbānī thī

jaag uTThā thā sub.h maut kī niiñd se
raat aa.ī to martā huā maiñ hī thā

dost ahbāb se hañs bol ke kaT jā.egī raat
rind-e-āzād haiñ ham ko shab-e-furqat kaisī

raat bhar ab ūdham machā.eñge
ḳhvāhisheñ din meñ ḳhuub so lī haiñ

tham gayā dard ujālā huā tanhā.ī meñ
barq chamkī hai kahīñ raat kī gahrā.ī meñ

zīna-e-zāt kā safar aur raat
dhīre dhīre utar rahā huuñ maiñ

huī jaatī hai sahar aisā bhī ghabrānā kyā
raat gar hai bhī to ai māh-jabīñ thoḌī sī

raat aa.ī to taḌapte haiñ charāġhoñ ke liye
sub.h hote hī jinheñ log bujhā dete haiñ

jab sitāre nuqta-e-anfās par bujh jā.eñge
maiñ ḳhudā ko jaan bhī us raat dene ā.ūñgā

nuur kī maujeñ mire hamrāh hoñgī aur maiñ
raat ke hāthoñ meñ apnā haath dene ā.ūñgā

saarī raat kahānī sun ke ham to lab na kholeñge
vaise chhup ke hañs bhī leñge vaise tanhā ro leñge

ba-nām-e-tishnagī laao koī dahaktā ayāġh
ye sard raat jalāo ki ḳhvāb larzāñ haiñ