Tags-Raat

chehre pe girā ke apnī zulfeñ
tū hukm kare to raat hove

lakīr nuur kī jo āsmān-e-dil pe banī hai
añdherī raat kā hamla huā to Dhaal huī hai

qad-e-mauzūñ ke ishq meñ 'goyā'
raat din shuġhl-e-sher-ḳhvānī hai

aur baḌhegā dard-e-dil raat jo bhiig jā.egī
dekh na vaqt kī taraf vaqt bhī chārāgar nahīñ

dil se 'shamīm' guftugū dekhiye kab talak chale
raat bhī muḳhtasar nahīñ baat bhī muḳhtasar nahīñ

raat hī gar chup-chāp mile
sub.h bhī phir chanchal kyā ho

kitnī sarkash bhī ho sar-phirī ye havā rakhnā raushan diyā
raat jab tak rahe ai mire ham-navā rakhnā raushan diyā

raat kaisī bhī ho ḳhauf ke chor kī ghaat kaisī bhī ho
apnī ummīd kā apne vishvās kā rakhnā raushan diyā

din muñh khole gaatī dhuup
raat se kyuuñ sharmātī dhuup

koī so rahā hai ujāle meñ din ke
koī raat ke ḳhauf se jāgtā hai

suunī rahī intizār kī raat
ashkoñ ne bahut diye jalā.e

roz raushan raheñ hālāt zarūrī to nahīñ
chāñdnī raat ho har raat zarūrī to nahīñ

mujh se maazī mirā kal raat simaT kar bolā
kis tarah maiñ ne yahāñ ḳhud ko sambhālā dekhūñ

vaqt kī aañkh se kuchh ḳhvāb na.e māñgtā hai
dil mirā ek duā raat ga.e māñgtā hai

āsmāñ TuuT kar nahīñ girtā
bijliyāñ rāt-bhar kaḌaktī haiñ

hijr meñ tere tasavvur kā sahārā hai bahut
raat añdherī hī sahī phir bhī ujālā hai bahut

ab yaas kā aalam taarī hai ye raat bhī ham par bhārī hai
ai 'jauhar' us ke va.adoñ par ab ziist kā sāmāñ kaun kare

terī āġhosh meñ niDhāl huuñ maiñ
bhīgtī raat kā zavāl huuñ maiñ

aur pichhle-pahar gale mil le
Dūbtī raat kā kamāl huuñ maiñ

sun rahā huuñ der se dhīmī sī dastak kī sadā
kaun hogā is añdherī raat meñ