Tags-Raat

ab kūcha-e-dil-bar kā rah-rau rahzan bhī bane to baat bane
pahre se adū Talte hī nahīñ aur raat barābar jaatī hai

koshish havā ne raat bhar apnī sī kī magar
zanjīr-e-dar ko maiñ ne hī hilne nahīñ diyā

bhalā 'imām' tahajjud guzār kyā jāneñ
ki raat kitnī hasīñ hai sharāb-ḳhāne kī

rāt-bhar chāñd kī ThanDak meñ sulagtā hai badan
koī tanhā.ī ke dozaḳh se nikāle mujh ko

raushan kabhī ho jā.eñge din raat mire
bas ek vahī jaane hai jazbāt mire

usī kī diid ko ab raat din taḌapte haiñ
ki jis se baat na kī ham ne dū-badū ho kar

huī na jazb zamīñ meñ to raat kī bārish
fazā meñ phail ga.ī ḳhaak rañg-o-bū ho kar

hayā kī ik hasīñ chādar agar taanī nahīñ hotī
tumhārī sub.h raushan raat nūrānī nahīñ hotī

ġhārat kiyā aḳhīr javānī meñ dahr ko
duniyā tamām luuT lī thoḌī sī raat meñ

shādī huī jo raat ko khele vo ganjifa
raushan kiyā ġhulām ne ikkā barāt meñ

maiñ sochtā huuñ mujhe intizār kis kā hai
kivāḌ raat ko ghar kā agar khulā rah jaa.e

raat ke lamhāt ḳhūnī dāstāñ likhte rahe
sub.h ke aḳhbār meñ hālāt behtar ho ga.e

raat ke ghar meñ baḌā kohrām thā
sub.h kī ab be-zabānī aur hai

bhīgā bhīgā sub.h kā āñchal
raat bahut paanī barsā hai

tum nahīñ aa.e aur raat rah ga.ī raah dekhtī
tāroñ kī mahfileñ bhī aaj āñkheñ bichhā ke rah ga.iiñ

aap hī ke pahlū meñ
raat raat bhar jaage

maiñ din ko raat ke dariyā meñ jab utaar aayā
mujhe zamīn kī gardish pe e'tibār aayā

shab-e-firāq ke lamhe the itne tūlānī
maiñ ek raat meñ sadiyāñ ka.ī guzār aayā

din ke bhūle ko raat Dastī hai
shaam ko vāpsī nahīñ hotī

mirī nigāh meñ din hai mire badan meñ hai raat
mirī kitāb adhūrī paḌī hai barsoñ se