Tags-Raat

ye raat yuuñ hī to dushman nahīñ hamārī ki ham
darāzi-e-shab-e-ġham ke sabab se vāqif haiñ

luTā ho kārvāñ jis kā ujāloñ ke ishāroñ se
añdherī raat chalne kī ḳhatā.eñ kaun kartā hai

jo intizār abad tak hai jism-o-jāñ ke firāq
jo ho sake to ab is raat ko abad se milā

zindagī bhar ab añdherī raat meñ hai jāgnā
ab to qismat kā sitāra bhī chamak kar so gayā

zindagī hijr meñ bhī yuuñ hī guzar jā.egī
vasl kī ek hī gar raat hai ye bhī na sahī

chāñd ik saath saath chaltā thā
raat ke paar utar gayā shāyad

fanā honā añdherī raat kī taqdīr hai 'ālam'
mujhe ye bebasī bhī zindagī mālūm hotī hai

raat ko roz Duub jaatā hai
chāñd ko tairnā sikhānā hai

raat kā pichhlā pahar mujh ko bashārat de gayā
aa rahī hai raushnī tārīk galiyoñ ke liye

kitnī tavīl kyuuñ na ho bātil kī zindagī
har raat kā hai sub.h muqaddar na bhūlnā

soch kī dhuup to kyā kam hogī soch kī kirneñ aam huiiñ
raat ke saa.e mere sar ke sūraj par phailāo to kyā

theater raat ko aur din ko yāroñ kī ye spēcheñ
duhā.ī laaT sāhab kī mirā īmān jaatā hai

chhuā thā jin meñ kabhī mujh ko terī chāhat ne
vo lamhe jāgte rahte haiñ raat bhar mujh meñ

ye vasl kī raat hai ḳhudārā naqāb chehre se mat haTāo
tumhāre chehre kā ye ujālā sahar se pahle sahar na kar de

hijr kī raat guzartī hī nahīñ
kab talak bazm pe tārīkī rahe

ātish-e-hijr se kyā Dar jo tirī marzī se
raat kar deñge basar loT ke añgāroñ meñ

kaisī haiñ āzmā.isheñ kaisā ye imtihān hai
mere junūñ ke vāste hijr kī ek raat bas

dāġh-e-dil ko raushan kar ġham kī raat hai lambī
sham.a kā bharosa kyā mah bhī bevafā sī hai

ek raat aap ne ummīd pe kyā rakkhā hai
aaj tak ham ne charāġhoñ ko jalā rakkhā hai

shauq ke shahr-e-tamannā ke Thikāne guzre
raat phir zehn se kuchh ḳhvāb purāne guzre