Tags-Raat

ye chamaktā huā sūraj bhī mirī shaam ke ba.ad
raat ke gahre samundar meñ utar jā.egā

raat ga.e zindāñ meñ jaane kis qaidī kā mātam thā
us kī beḌiyāñ chup chup sī thiiñ aur ujālā kam kam thā

jab koī bhī nahīñ hai to phir raat bhar 'zafar'
hotā hai kaun aake bayānī mirī taraf

shab-gazīda logoñ ko niiñd se ulajhnā hai
raat kī masāfat meñ razm-e-sub.h-gāhī kyā

aap kī kal yaad meñ 'bedār' ko
ginte guzrī raat taare aa.iye

saiñkaḌoñ raat ke kiye va.ade
un kī raat aaj tak 'qamar' na huī

raat din rahtī hai niyyat bāda-e-gul-rañg meñ
ye parī vo hai ki jo āThoñ pahar shīshe meñ hai

añdherī raat sannāTe kā aalam
nadī ke paar ik lapkā jagā thā

raat ke kaale kuñ.eñ meñ chhup gayā saaya mirā
is se pahle to kabhī ye rañg-e-tanhā.ī na thā

raat 'shāhīn'! āñkhoñ meñ kaTne lagī
is tarah gum huī raushnī shaam meñ

aatā hai nazar anjām ki saaqī raat guzarne vaalī hai
baaqī hai ḳhudā kā naam ki saaqī raat guzarne vaalī hai

ḳhurshīd ko jaam se sharmā.eñge shaam ko terā va.ada thā
īfā-e-ahd-e-shām ki saaqī raat guzarne vaalī hai

ham kitnī piine vaale haiñ tum kitnī pilāne vaale ho
ye raaz hai tasht-az-bām ki saaqī raat guzarne vaalī hai

ai rindo haath pe haath dhare kyā saaqī kā muñh takte ho
mahfil meñ mache kohrām ki saaqī raat guzarne vaalī hai

ye raah par aa hī jā.egā tū zāhid se māyūs na ho
uTh le ke ḳhudā kā naam ki saaqī raat guzarne vaalī hai

ye barham hone vaalī mahfil yuuñ bhī barham ho jaatī
ham kah ke hue badnām ki saaqī raat guzarne vaalī hai

ab koī nahīñ sannāTā hai tāroñ kī āñkheñ jhapkī haiñ
chal saath mire do-gām ki saaqī raat guzarne vaalī hai

ḳhayāl tak na kiyā ahl-e-anjuman ne zarā
tamām raat jalī sham.a anjuman ke liye

din bhī Duubā ki nahīñ ye mujhe ma.alūm nahīñ
jis jagah bujh ga.e āñkhoñ ke diye raat huī

naale kiye tasavvur-e-gesū meñ raat bhar
dil ham-safīr-e-murġh-e-shab-āhañg ho gayā