Tags-Raat

raat kitnī behis hai
us kī āstīnoñ meñ

raat jaise bahrī hai
siskiyāñ nahīñ suntī

ai raat sarāboñ ke sivā kuchh na milegā
maiñ din ke ujāle meñ agar sham.a jalā duuñ

ab raat Dhal rahī hai koī do kā vaqt hai
āñkhoñ meñ niiñd jhuul rahī hai abhī talak

tumhārī sham-e-tamannā bas ek raat bujhī
charāġh merī tavaqqo.a ke roz bujhte haiñ

ek ḳhāmosh sī āvāz meñ kuchh gaate haiñ
raat ke ḳhvāb jo jugnū kī tarah aate haiñ

tanhā kamre suunā āñgan raat udaas
phir bhī ghar meñ sargoshī sī suntā huuñ

zabt kī had se ho ke guzarnā so jaanā
raat ga.e tak bāteñ karnā so jaanā

din bhar hijr ke zaḳhmoñ kī marham-kārī
raat ko tere vasl meñ marnā so jaanā

phir rāstoñ pe raat bhaTaktī hai ai 'tapish'
maiñ ik diyā jalā.ūñ ki manzil dikhā.ī de

maiñ nahīñ jāntā
aise din raat ko dil nahīñ māntā, por par jin kī gintī Thahartī nahīñ

is añdhere meñ to Thokar hī ujālā degī
raat jañgal meñ koī sham.a jalāne se rahī

andhī rāhoñ kī uljhan meñ bechārī ghabrā.ī raat
pahle lahū meñ phir aañsū meñ phir kirnoñ meñ nahā.ī raat

ik parde ko uTh jaanā thā ik chehre ko aanā thā
kitnī hasīñ thī kitnī dilkash sharmā.ī sharmā.ī raat

har shāḳh-e-gul meñ thī ye narmī ġhunche tak gir jaate the
aaj har ik Tahnī patthar hai kaisī āñdhī laa.ī raat

ek karishma ik dhokā thā ek tahayyur-sāzī thī
lekin ik aalam ne ye samjhā ki din se Takrā.ī raat

ek nayā dar ek nayā ghar ek nayā hañgāma hai
ek na.e rahzan ke ghar ik nayā musāfir laa.ī raat

kis ne māñgī thī sar-e-shām duā mere liye
aaj kī raat tujhe chāñd na tanhā dekhe

terī āñkhoñ kī chamak hai yā sitāroñ kī ziyā
raat kā hai ghup añdherā yā tire kājal kā rañg

hijr kī raat kāTne vaale
kyā karegā agar sahar na huī